பழமொழி நானூறு சங்கம் மருவிய காலத் தமிழ் நூல் தொகுப்பான பதினெண் கீழ்க்கணக்கு நூல்களுள் ஒன்று. அதன் சிறப்புப் பாயிரத்தையும், கடவுள் வணக்கத்தையும் சேர்த்து நாலடியால் அமைந்த நானூற்றொரு (401) பாடல்களைக் கொண்டது.

பொருளுரை:

எண்ணுதற்குக் குறைவு இல்லாத செல்வமும் உயர்குடிப் பிறப்பும் மன்னரைத் தம் வயத்தராய் உடைய உரிமையும் அரசர்களால் இத் தன்மையுடையாரெனப் புகழப்படுதலும் விரும்பத்தக்கனவல்ல இப்பிறப்பிற்கும் மறு பிறப்பிற்கும் உறுதியாகிய தம்முடைய தலைவனாகிய கடவுளை உடைமையாகக் கொள்ளுதலே சிறந்தது.

கருத்து:

ஒவ்வொருவரும் கடவுளைஉடைமையாகக் கொள்ளுதலே சிறந்தது.

பொருளுரை:

துறவறத்திற்கு விதிக்கப்பட்ட நெறியின்கண் தாம் அடங்கி ஒழுகி, ஐம் புலன்களையும் பொறிகள் மேற் சொல்லாதவாறு செறியப் பாதுகாவல் செய்து, தாம் செய்யத் தொடங்கிய துறவற நெறியில், மனம், மொழி, மெய் என்ற மூன்றானுந் தூயராய் மாட்சிமைப்பட்டு, இவ்வுலகத்தின்கண் இவ்வுடம்பு ஒழிந்து நிற்க, இனிச் செல்ல விருக்கும் மறுமைக்கு உறுதியைக் காலம்பெறச் செய்யாதவர்களே, தீயின் மீது நெல்லினைப் பெய்து பொரித்து உண்ணுபவரோ டொப்பர்.

கருத்து:

காலம் பெறத் துறந்து வீடு எய்துக என்றது இது.

பொருளுரை:

தன்னுடன் நட்புச் செய்து கொண்டவர்களைச் செல்வமுடையவராகச் செய்து பகைவரை அழித்து கூரிய பற்களையும் பட்டுடை பொலியும் உடுக்கை போன்ற இடையினையு முடைய பெண்கள்மீது காதல் கொண்டு பொருந்தி இல்லறத்தைத் தொடங்கிச் செய்தவர்கள் அது முடிந்த பிறகு துறவறத்தில் துறந்து செல்லாத உடம்பினான் என்ன பயனுண்டாம்?

கருத்து:

இல்லற நெறியில் நின்று அதன் பின்னர்த் துறவறம் சேர்க.

பொருளுரை:

இல்லறத்தை யாயினும் அஃதின்றி நின்ற துறவறத்தை யாயினும் தாம் மேற்கொண் டொழுகாதவராகி சிறந்த வாணாள் வறிதே கழிய இடை நின்று எல்லாவற்றையும் ஆழ்ந்து உறுதியாகத் துணிந்து ஒருநெறிக்கண் ஒழுகாதவர்களே காவின் இருபக்கத்திலுமுள்ள பொருளை நீக்கித் தண்டினைச் சுமந்து நின்றாரோ டொப்பர்.

கருத்து:

இரு வாழ்க்கையினுள் ஒன்றன் கண்ணும் துணிவோ டொழுகாதவர்கள் இம்மை மறுமை இன்பங்களைப் பெறார்.

பொருளுரை:

செல்வமும், புகழும், இளமையும் என்றிவை யெல்லாம் உளவாக; மதித்து அஞ்சி மாறும் அஃதின்மையால் - அவற்றை மதித்துப் பயந்து நீங்குந்தன்மை கூற்றத்திற்கின்மையால் இயமனினின்றும் பிழைத்துச் சென்றாராக அறியப்படுவார் ஒருவரும் இலர்.

கருத்து:

வளமை, தேசு, முதலியவற்றின் நிலையாமை நோக்கித் துறந்து துறவற நெறியிற் சேர்க.

பொருளுரை:

தான் கொண்டு ஒழுகுகின்ற மூன்றற்கும் உதவி செய்த லில்லாத வேட்கைத் தோற்றம் முன்னர் நல்வினை செய்தமையான் வந்த செல்வத்தை அங்குத்தானே பயன்படுத்திக் கொண்டு அவ்வாசை நரகச் சேற்றில் உதைத்துச் சென்று வீழ்த்தலால் ஒருவனுடைய ஆசையாகிய அம்பு ஆயுளைப் புகுந்து கெடுத்துவிடும்.

கருத்து:

பிறர்க்குதவி செய்தலில்லாத ஆசையே ஒருவனை நரகத்துள் அழுத்தவல்லது.

பொருளுரை:

செல்வத்தின் அளவினையும் தம் வாழ்நாளின் அளவினையும் தாம் தெளிய ஆராய்ந்து அறியாராகி சிறிய இல்லற இன்பத்தினாலே தருக்குற்று அருந்தவர்கள் உறையும் பள்ளியினிடத்து வாழாராகி இல்லின்கணிருந்து இன்புற்று வாழுகின்றவர்களே சிறந்த தேனை உண்ணாது முள்ளிச்செடியின் தேனை உண்ணுகின்றவர்களோ டொப்பர்.

கருத்து:

துறவறம் சேர்தலின்றி இல்லறத்திலேயே இருந்து மகிழ்ந்து இருப்பது முள்ளித்தே னுண்பதை யொக்கும்.

பொருளுரை:

எனக்குறுதி சூழும் என் நெஞ்சமே! வலிய நெஞ்சினராய இயமனுடைய வேலையாட்களின் பின்னே செய்த குற்றங்களை நினைத்து அழிந்து செல்வாய் (ஆனால்) இப்பொழுது இழிந்த செயலிற் புகுந்து நின்று செய்கின்றாய் மனைவாழ்க்கையின் பொருட்டு நீயும் இனியவற்றைக் கூறி நின்று இறவாது. செல் துறவறத்திற்குச் செல்வாயாக நெஞ்சமே அம்மனைவியும் மக்களும் பல தளைகளாவராதலின்.

கருத்து:

பெண்டிரும் மக்களும் தளைகளாதலின், அவற்றை யொழித்துத் துறவறம் சேர்க.

பொருளுரை:

ஒலித்துவரும் அருவிகள் தினைப்புனத்தின்கண் வீழும் மலைநாடனே! சிறப்புடைத்தாய தம்முடைய மக்களையும் தாம் ஈட்டிய பொருளையும் பற்றுவிட்டுத் துறந்தவர்கள் தமது உடம்பின்மீது பற்றுக்கொண்டு ஒழுகுதல் எது கருதி ஒரு வாயிலின்கண் யானை போய் அதன் வால் போகாவாற்றை அஃதொக்குமன்றோ.

கருத்து:

துறவறநெறி நின்றார் அகப்பற்றினை முற்ற நீக்குக என்றது இது.

பொருளுரை:

எல்லா வகைப் பிறப்புக்களிலும் ஈட்டித் தாம் மேற்கொண்ட தீவினையின் விளைவு தம்மேற் சார்தலுக்கு அஞ்சி எவ்வளவு சிறிய தீவினையையும் அநுபவிக்கின்ற விடத்துத் துன்பத்தை அடைகின்றோம் அச்செயல் குழியினின்றும் தோண்டப்பட்ட பூழி அக்குழியை நிரப்ப முடியாதவாறு போலும்.

கருத்து:

வினை தம்மா லீட்டப்பட்டதே யாதலின், அதன் விளைவை இயைந்து அநுபவிக்க வேண்டும்.

பொருளுரை:

விளக்கு திரியையும் அகலையும் நெய்யையும் பற்றுக் கோடாகக் கொண்டு அழகாக எரியும்; சார்வுகளின்றேல் எரியாது அது போன்று ஆராயுமிடத்து சார்வாக நின்ற மூவகை வினையும் அற்றுப்போக (அவ்வினையறுதலே) பிறவித் துன்பத்தை நீக்கும் அதைப் போலவே நீர் அற்றுப்போகவே அந்நீரிற் சார்ந்து வாழும் உயிர்களும் இறந்துபோகும்.

கருத்து:

வினையறவே பிறப்பறும்.

பொருளுரை:

காடுகளையுடைய முல்லை நாடனே தீயதாயினும் பழகிய நெறி வானுலகத்தை யொப்ப இன்பம் பயந்து பின்னர் நீங்குதற்கு அரிதாகி விடுமாதலால் ஒளி பொருந்திய கடலை வேலியாகவுடைய இவ்வுலகத்தி லுள்ளவர்கள் தாம் மேற்கொண்டு ஒழுகுகின்ற அந்நெறியை விரும்புகின்றார்கள் என்பதை அறிந்தன்றி யாதொரு நெறியின் கண்ணும் பழகுதலிலர் அறிவுடையார்.

கருத்து:

அறிவுடையார் உலகொப்பிய நெறியை மேற்கொண் டொழுகுவார்கள்.

பொருளுரை:

பல்வேறு வகைப்பட விரிந்த சமயத்தார் கொள்கைகள்மீது பல நெறிக்கண்ணும் செல்லாதவர்களாகி நன்மை நிரம்பிய கொள்கையை ஆராய்ந்தறிந்து மேற்கொள்க. பரம்படித்த கூலி எக்காலத்தும் பதக்கு நெல்லே உறுதியாக வரும்; (அதுபோல) கடைப்பிடித் தொழுகிய அக்கொள்கையே எல்லையில்லாத பெருமையை உறுதியாகத் தரும்.

கருத்து:

ஒரு நெறியை உறுதியாகக் கொண்டொழுகுக.

பொருளுரை:

அழகுடையாய்! பெண்மைக் குணம் நாணின்றி உண்டாகாது; காப்பாற்றுமிடத்து நலம் மிகுந்த உணவு இல்லாது உயிர் வாழ்ந்திருத்தல் முடியாது; செயல்கள் கைப்பொருள் இல்லாது முடிதல் இல்லை; விதையின்றி விளைவும் இல்லை.

கருத்து:

பெண்களுக்கு நாண் வேண்டும் என்றது இது.