பழமொழி நானூறு சங்கம் மருவிய காலத் தமிழ் நூல் தொகுப்பான பதினெண் கீழ்க்கணக்கு நூல்களுள் ஒன்று. அதன் சிறப்புப் பாயிரத்தையும், கடவுள் வணக்கத்தையும் சேர்த்து நாலடியால் அமைந்த நானூற்றொரு (401) பாடல்களைக் கொண்டது.

பொருளுரை:

பிறங்கல் அமையொடு வேய் கலாம் வெற்ப மலையில் மூங்கிலுடனே வேய்கள் நெருங்கி இணங்கி நிற்கும் வெற்பனே! சிறந்தனவாகிய இன்பங்களை அடைந்து இன்புற்றொழுகும் பொருளுடையவர்கள் அறங்களைச் செய்து யாவர்மாட்டும் அருள் உடையவராகி ஒழுகுதலாகிய அச்செயலே ஒருவன் பொற்சுமையொடு அதன் மேலே மணிச் சுமையையும் வைத்துச் சுமந்து செல்லுதலை யொக்கும்.

கருத்து:

செல்வ முடையார் அறமும் அருளும் உடையவராகுக.

பொருளுரை:

தான் தேடி வைத்த பொருளைப் பின்னர் வந்து பயன்படுவதாகக் கருதற்க தாம் அப்பொருளை நுகர்ந்தும் பிறருக்குக் கொடுத்தும் இருமைக்கும் அழகுண்டாகுமாறு செய்யத் தகுந்த இடம் நோக்கி அறங்களைச் செய்யின் தளர்ந்த காலத்து உதவும் பொருள் என்பது அதுவன்றோ?

கருத்து:

அறமே எய்ப்பினில் வைப்பாம்.

பொருளுரை:

மென்மையான சாயலையும் தளர்ந்து துவண்டு வளையும் இடையினையும் உடையாய் வளமையைத் தரும் மிக்க செல்வத்தை மாட்சிமையுடையார் பெற்றால் இனிச் செல்லுகின்ற மறுமையிலும் இன்புறுமாறு அதற்கான அறத்தைச் செய்துகொள்வது பசிய கரும்பினைச் சுவைத்தறிந்து மேலும் சுவைக்கப் பாகு செய்து கொள்ளுதலை யொக்கும்.

கருத்து:

பொருள் பெற்றால் இம்மைக்கும் மறுமைக்கும் - ஆவனவாகிய அறத்தை அதனைக் கொண்டு செய்து கொள்க.

பொருளுரை:

அறஞ் செய்கின்ற ஒருவன் ஈனுலகத்தாயின் இசை பெறும் இவ்வுலகின் திறத்து ஆராய்வோமாயின் புகழினைப் பெறுவான் இவ்வுலகினின்றும் நீங்கி மறுமை யுலகத்தின்கண் சென்றானாயின் அவ்வுலகமும் இனிதாக ஆகும். (ஆதலின்) நாள்தோறும் நன்மையைப் பயக்கும் அறங்களைச் செய்கின்றவனுக்கு இரண்டுலகி னின்பமும் கவட்டை நெறியின்கண் உளவாகிய கலியாணங்களைப் போலும்.

கருத்து:

இம்மை மறுமை இன்பங்களை அறம் எய்துவித்தலால், அதனை நாள்தோறும் செய்க.

பொருளுரை:

உணர்வு அழிவதன் முன்னே பல திறத்த செயல்களான் வரும் அறங்களை ஆராய்தலின்றிச் செய்யாதவர்கள் பிற்காலத்தில் செய்வோம் என்று நினைத்திருந்து நோய்கள் சூழ்ந்து நின்று தமக்கு இறுதியை ஆராயும்பொழுது தாம் கூறியபடி அறம் செய்வாரைக் காணாதிருத்தல் நாயைக் கண்ட பொழுது கல் மறைதலை யொக்கும்.

கருத்து:

அறத்தைப் பொருள் பெற்றபொழுதே ஆராய்தலின்றி உடனே செய்க.

பொருளுரை:

மாறுபாடில்லாத செயல்களை உடைய செல்வத்தை ஒருவன் பெற்றால் அச் செல்வம் திரண்டு வந்த திறனும் அதற்குக் காரணமாயிருப்பதும் அறமேயென் றறியப்படுமானால் பலதிறப்பட்ட நெறியால் அறம் செய் யென்று ஒருவன் சொல்ல அவனைச் சினத்தல் சர்க்கரை கலந்த பாலை உட்கொள்ளாது குமட்டித் துப்புதலை யொக்கும்.

கருத்து:

அறத்தாற் பொருள் பெறலா மென்றறிபவன் பலதிறப்பட்ட நெறியால் அறமியற்றக் கடவன்.

பொருளுரை:

அழிவில்லாத உலகத்து அடையும் உறுதியாகிய நன்மையை நோக்கி நல்ல அறநெறியைக் கைக்கொள்ளாதாரை அந் நெறியினின்றும் நீக்கி அடக்கி அறநெறியைக் கொள்ளுமாறு அறிவு கொளுத்துதல் மாறுபட்டு அழுதுகொண்டு பாலுண்ணாத குழந்தைகளை தாய்மார்கள் வருத்திப் பால் உண்பித்தலை யொக்கும்.

கருத்து:

அறிவுடையோர் அஃதிலராகித் தீநெறியிற் செல்லும் மடவோரை அடக்கி அறிவு கொளுத்துக.

பொருளுரை:

செல்வத்திற்கு வேண்டும் புறச் செயல்களைச் செய்ய அதனால் செல்வம் வளரும் அறங்களைச் செய்ய அதனால் பாவங்கள் பற்றுதலைவிட்டு ஒழியும் (ஆதலால்) அறங்களைச் செய்கின்றவர்களுக்கும் அறஞ்செய்யு மிடத்தை ஆராய்ந்து செய்யும் கூறுபாட்டை அறிந்து செய்தால் செல்லுகின்ற மறுமையுலகின்கணின்பமுண்டாகும்.

கருத்து:

அறஞ்செய்வார் இடனும் செய்யும் கூறுபாடும் அறிந்து செய்க.

பொருளுரை:

அறிவின் மயக்கம் அஞ்சத் தகும் நோய், மூப்பு, அருங்கூற்று என்ற இவைகளுடன் சேர்ந்து, தடையில்லாது இறந்துபடுமாறு வந்து சேரும். (ஆதலால்), தோன்றுதற் கருமையாகிய இம் மக்கள் பிறப்பைப் பெற்றதனால், ஒல்லும் வகையான் அறவினையைச் செய்க.

கருத்து:

ஒவ்வொருவரும் தத்தமக் கியலுமாற்றான் அறம் செய்க.

பொருளுரை:

அறம் செய்வதற்குப் பொருந்திய நெறியால் பலரும் வருந்தாதவாறு தனக்கு உறுதி உடைத்தாகுமாறு கருதிச் செய்தொழுகிய நல்லறத்தை இடையூறுடைத்தாகி அதனான் இடையிலே நிறுத்தி ஒழிதலைவிட பயிரை நட்டுவைத்து அதனை அறுத்துப் பயன்பெறா தொழிந்தா னெனப்படுதலே நல்லது.

கருத்து:

அறஞ் செய்வார் இடர்ப்பாடு நோக்கி இடை நிறுத்தலாகாது.

பொருளுரை:

மேகலையைத் தாங்கி இறுவது போலும் நுசுப்பினை உடையாய் நல்லறம் செய்யும் நன்மையைச் சுற்றத்தார் செய்யார் (ஆதலால்) பல நாட்களும் அறத்தைச் செய்யாராயினும் அறத்தைச் சில நாளாயினும் சிறந்த நெறிகளாற் செய்துய்வாயாக.

கருத்து:

அறத்தைச் சில நாளாயினும் செய்துய்க.

பொருளுரை:

வெயிலில் காயும் பொருள்களைப் பார்த்துக் கொண்டிருந்தவர்கள் இமை கொட்டும் அளவிலே எங்ஙனம் காவல் செய்து கொள்ளப்படினும் அவ்வுணங்கலைப் புட்கள் திருடிச்செல்லும். (அதுபோல) அரண் செய்து பாதுகாத்துத் தமக்காக வைக்கப்பட்டிருக்கும் ஒள்ளிய பொருளுக்கும். காவல் செய்வாரைவிட அதனைக் கொள்ளப் பார்க்கின்றவர்கள் மிகப் பலராவர்.

கருத்து:

பொருளைக் கொள்ளப் பார்க்கின்றவர்கள் பலராதலின், உடனே அறஞ் செய்துவிடுதல் நல்லது.

பொருளுரை:

தம்மையின்றி உயிர் வாழாத இருவராகிய முதிய தாயும் தந்தையும் தாந் தேடிய பொருளையும் தம்மையும் விட்டுவிட்டு இறந்தமையை அறிந்தும் செல்வத்தை ஒரு பொருளாக மனத்தில் கொள்வார்களோ? பொருந்தும் நெறியான் அறத்தைச் செய்துய்க மலை ஊர்ந்து உருண்டு செல்லுமாயின் அதனைவழி நின்று தடுப்பது ஒன்றுமில்லை யாதலின்.

கருத்து:

செல்வத்திற்கே யன்றி உனக்கும் நிலையாமை உண்மையால் உடனே அறம் செய்க.

பொருளுரை:

அறத்தினுக்கு அருள் உடையரா யிருத்தல் பண்பாதலை ஆராய்ந்து அதன் திறனை முழுதும் அறிந்தார்கள் காரணம் அறிந்து அறம் செய்வாரெனப்படுவார் தெளிவாக காரணமாகிய அருளைவிட்டு திறந் தெரியாமையான் அவ்வறத்தையும் கைவிட்டாருடைய பாதுகாவாத கொடை நிலத்தில் கண்ணோடும் முயலைவிட்டு ஆகாயத்தின் கண் செல்லும் காக்கையைப் பின் தொடர்ந்து சென்று தின்ன முயலுதலை யொக்கும்.

கருத்து:

அருளோடு கூடிய அறம் சிறந்தது என்றது இது.

பொருளுரை:

தம்மை வீட்டின் கண் செலுத்தும் விருப்பம் உடையார் தாம் இப் பிறப்பின் கண்ணே செய்யும் தவமும் அறமும் ஆகிய இவ்விரண்டு நெறியின் கண்ணும் அவற்றை வஞ்ச மனத்தராய்ச் செய்தல் இம்மையின் கண் பழியை உண்டாக்குதலே யல்லாமல் மறுபிறப்பின் கண்ணும் நிரயத்தினின்றும் தாம் வெளியேறாதவாறு தம்மை இறுகக் கட்டி வீழ்த்தும் கயிறாகவும் ஆகும்.

கருத்து:

வஞ்ச மனத்தராய்த் தவமும் அறமும் புரிந்தொழுகுவார் பழியையும், நிரயத்தையும் அடைந்து துன்புறுவர்.