பழமொழி நானூறு சங்கம் மருவிய காலத் தமிழ் நூல் தொகுப்பான பதினெண் கீழ்க்கணக்கு நூல்களுள் ஒன்று. அதன் சிறப்புப் பாயிரத்தையும், கடவுள் வணக்கத்தையும் சேர்த்து நாலடியால் அமைந்த நானூற்றொரு (401) பாடல்களைக் கொண்டது.

பொருளுரை:

அருவிகள் விட்டு விளங்கிப் பொன்னைக் கொழித்து இழியும் குளிர்ச்சி பொருந்திய மலைநாடனே! தம்மை ஒரு பொருளாகக் கொண்டு அடைந்தவர்களுக்குற்ற தீமை தம்மை அடைந்ததாகவே நினைத்து அதனான் வரும் துன்பமும் எம்மை யடைந்ததேயாம் என்று அறிதலின்றி அதனைக் களையாது விட்டவிடத்து அவர் என்ன ஆவர்? உமியைக் குற்றுதலான் கை வருந்து மாற்றை யொக்கும்.

கருத்து:

தம்மை யடைந்தாரைத் தாம் காத்தல் வேண்டும்.

பொருளுரை:

தம்மை அடைந்தாராகிய ஒருவரை அவரா லடைந்து ஒழுகப்பட்டவர் தொடர்பு இல்லாதவராகக் கொண்டு தெளிய அறியினும் ஆராய்ந்து விட்டு நீங்குதலில்லா வறுமையை நீக்க அறியானாயின் அவனுக்குச் செல்லும் நெறி வேறு யாதுளது? எல்லாம் பொய் - (உணவு அளித்தலை நோக்க ஏனைய எல்லா அறங்களும் பொய்) சமைத்துச் செய்த உணவை இடுமறமே மெய்யாமாதலின்.

கருத்து:

எல்லா அறங்களுள்ளும் உணவளித்தலே சிறந்த அறமாகக் கருதப்படும்.

பொருளுரை:

ஒருவர்க்குத் துன்பம் வந்தமையுமானால் அவருக்கு நெருங்கிய உறவினர் என்று சொல்லப்படுபவர்கள் நல்ல செயல் முறையான் அத் துன்பத்தை நீக்க முற்படுக அச்செயல் இல்லின்கண் உள்ள மரமாகிய மருந்தினையொக்கும் அல்லலுற்றார்க்கு.

கருத்து:

அல்லலுற்ற காலத்து அவ்வல்லலை நீக்குபவரே சுற்றத்தார் எனப்படுவார்.

பொருளுரை:

கருமை நிறைந்த நீண்ட கூந்தலையும் பசிய தொடியினையும் உடையாய்! உண்மையாக ஆராயின் உறவினரல்லாதோர் பிறருக்குச் செய்யப் போவது என்ன இருக்கின்றது? ஒரு காலத்தும் செய்யமாட்டார் என்று கருதும்படி இருந்தாரேயாயினும் உறவினரே ஒரு நன்மையைச் செய்வார்கள் குறித்த ஒரு பருவகாலத்தில் பெய்யாதொழியினும் பின்னையும் பெய்வது மழையேயாதலான்.

கருத்து:

உறவினரே தமக்குற்ற துன்பத்தை நீக்கும் உரிமையுடையவராதலால், அவரோடு சேர்ந்தொழுக என்றது இது.

பொருளுரை:

நீர்நாடனே! ஒரு குடியிற் பிறந்தவர்கள் முன்னர் இனிமையுடையவ ரல்லராயிருப்பினும் மிக்க துன்பம் வந்துற்றவிடத்து பின்னரும் இனிமையுடையரல்லராகிப் பிரிந்திரார் ஒரு குடிப்பிறந்தவ ரல்லவராகிய பிறரை பொன்போலப் போற்றிச் செயினும் தமக்கு இடர் வந்த ஞான்று அதனைநீக்கப் புகுதலிலர்.

கருத்து:

ஒரு குடியிற் பிறந்தவர்கள் தம்முள் ஒருவர்க்குத் துன்பம் வந்துற்ற பொழுது மாறுபாடு நீங்கி உதவி செய்வர் என்பதாயிற்று.

பொருளுரை:

நெல் விளைகின்ற கழனியுள் பூக்களை மிதித்து பறவைகள் தம்மிற் கூடி மகிழும் குளங்களையுடைய நீர் நாடனே தாயால் மிதிக்கப்பட்ட கால் முடம்படுதல் இல்லை. (ஆதலால்) மனம் நோவுமாறு உரைப்பராயினும் உறுதியாயினவற்றை சுற்றத்தாரிடத்துக் கேட்டறிதலே நல்லது.

கருத்து:

சொற் கொடுமை நோக்காது உறுதியாயினவற்றை உறவினரிடத்துக் கேட்டறிக.

பொருளுரை:

இனிய ஓசையை உடைய மலைநாடனே! ஒருவன் தன்னை மதித்துச் சுற்றத்தாராகக் கருதி ஒழுகியவிடத்து எல்லாத் துன்பமும் வந்து பொருந்தியதாயினும் சுற்றத்தார் செய்யும் உறுதியாயினவற்றைத் தாமும் செய்வதே தைக்கின்ற ஊசி போகின்றவழியே செல்லும் நூலிழையை ஒக்கும்; வரும் குற்றம் யாதுளது?

கருத்து:

உறவாக மதித்தார்க்கு உறவாய் நின்று உறுதி செய்க.

பொருளுரை:

கரையொடு மாறு கொள்ளும் கடலையுடைய குளிர்ந்த நெய்தல் நாட! அழகிய தாமரையிடத்து வாழும் இலக்குமியேயாயினும் நெடுநாள் உடனுறைதல் துன்பந் தருவதாம்; (அதுபோல) கருவினுள் தங்கியபொழுதே தொடங்கிக் கலந்தவர்களும் தமக்குள்ளே ஓர் இடத்தில் நீண்டநாளும் ஒருங்கே தங்கியிருந்து வாழுதல் துன்பம் தருவதாம்.

கருத்து:

உடன் பிறந்தாராயினும் ஒரே இடத்தில் நீண்ட நாள் தங்கியிருத்தல் ஆகாது.

பொருளுரை:

பாரதநூலுள்ளும் பந்தயப் பொருள் தம்முடைய தாயப்பொருளாகக் கொண்டு நூற்றுவரும் ஐவரோடும் சூதுப்போர் செய்து (அது காரணமாகப்) பகைவராகி இடைக்காலத்திலேயே தம்முயிரை நீக்கிக்கொண்டார்களென்றும் கேட்கப்படுதலால் அன்புடையவரோடு விளையாட்டாக வாயினும் சூதாடுதலிலர் அறிவுடையார்.

கருத்து:

சூதாடல் உயிர்க்கிறுதியைத் தருவதாம்.