பழமொழி நானூறு சங்கம் மருவிய காலத் தமிழ் நூல் தொகுப்பான பதினெண் கீழ்க்கணக்கு நூல்களுள் ஒன்று. அதன் சிறப்புப் பாயிரத்தையும், கடவுள் வணக்கத்தையும் சேர்த்து நாலடியால் அமைந்த நானூற்றொரு (401) பாடல்களைக் கொண்டது.

பொருளுரை:

மாட்சிமைப்பட்ட அணிகலன்களை உடையாய்! மயக்கந்தரும் கள்ளினைக் குடித்து சோம்பி அடங்கியிருப்பார் ஒருவருமிலர் (ஆதலால்) கொடி அசைகின்ற வலிய தேரினை உடைய அரசர்களது பொருளை உண்டு உயிர் வாழ்பவர்கள் ஒரு செயலை மனத்தின்கண் நினைத்தலை மேற்கொண்டு அவ்வரசர் ஏவிய ஆணையை சோம்பல் கொண்டு விரைந்து செய்யா தொழிதலால் என்ன பயன் உண்டாம்?

கருத்து:

அரசன் ஆணையை உடனேயே அவன்கீழ் வாழ்வார் செய்தல் வேண்டும்.

பொருளுரை:

வெற்றி பொருந்திய வேலேந்திய அரசன் ஏவல் கொண்டால் யாம் செயத்தகும் ஆற்றல் ஒரு சிறிதும் அடைந்தோமில்லையே என்று கூறுவது அறியாமையேயாம் அவர் ஏவிய செயலைத் துன்புறுதலின்றிச் செய்யத் தொடங்குக அச்செயல் செய்க என்று கூறியவன் உண்க என்று கூறியதை ஒக்குமன்றோ?

கருத்து:

அரசன் ஏவியதைத் தட்டாது செய்யத் தொடங்குக.

பொருளுரை:

எம்மவராதலான் எமக்கு இச்செயலை முடித்துத் தருக என்று அரசன் தன்கீழ் வாழ்வாரை ஒரு செயல் செய்யும்பொருட்டு நம்பி நியமித்த இடத்து. தமர் - அவன் கீழ் வாழ்வார் அவர் பொருட்டாக வேலிடத்தாயினும் வீழாதவர்களாகி இயலாது என்று மறுத்துக் கூறலின் (அஃது) அதோ தோன்றுவது (பெரிய) ஆலமரமென்று ஒருவன் கூறலுறின் (அதற்கு மாறாக) மற்றொருவன் அது சிறிய பூலாச் செடியே என்று கூறுதலை ஒக்கும்.

கருத்து:

அரசன் ஏவலை மேற்கொண்டார் உயிர் கொடுத்தாயினும் அதனை முடித்தல் வெண்டும்.

பொருளுரை:

மடல்களையுடைய பனைமரங்கள் மலிந்த கடல் நாடனே! பிறரால் வெல்லுதற்கரிய வலிமையுடைய அரசர்கள் தம்மைவிட்டு நீங்குமாறு நெருங்கி நின்று ஆகாதன செய்தும் அஞ்சி அகன்று நில்லாதும் அவர் மனமகிழ ஒழுகுவராயின் கடலில் உண்டாகாத வளமெல்லாம் அவர்க்கு உளவாம்.

கருத்து:

மன்னரைச் சேர்ந்தொழுகுவார் அகலாது அணுகாது வாழக்கடவர்.

பொருளுரை:

பனையினது பழம் முற்றின் தாய்ப்பனையினது தாளின் மேலேயே வீழும்; (அதுபோல) அரசன் தான் உவக்கும் படி செய்து முடித்தற்கு ஏவிய செயல்கள். அவற்று அவற்று ஆம் துணைய பயத்தால் ஆகி - அவ்வச் செயல்களின் அளவாகிய பயனோடு அச்செயல் முடியின் அஃது ஏவியவனையன்றிச் செய்தவனையே சேரும்.

கருத்து:

அரசன் ஏவிய கருமங்கள் பயன்பட முடிந்தால் அப்புகழ் செய்தவனையே சேரும்.

பொருளுரை:

தோன்றுகின்ற தேமலையும் ஒளிபொருந்திய அணிகலன்களையுமுடையாய்! வலிமிக்க எருதினுடைய கொம்பு கூரானது; (ஆதலான்) போரையுடைய அரசர்களாகிய எல்லாத் திறனுமுடையாரை அடைந்தவர்கள் பிறர் ஒருவருக்குப் பயந்து மனந்தளர்தலும் உண்டோ? (இல்லை.)

கருத்து:

அரசரேயன்றி அவரைச் சார்ந்தோரும் பிறருக்கஞ்சார்.

பொருளுரை:

ஆராய்ந்த நல்ல மெல்லிய கூந்தலை யுடையாய்! அரசனால் நன்குமதிக்கப்பட்டு அவனது மகிழ்ச்சிக்கு இடமானவரை அவன் மதிக்கின்ற தன்மை ஒன்று கொண்டே ஏனை மக்களும் அவனைப்போன்றே மிக மதித்து உணர்வர் நெய் இருந்த ஏனமேநெய் பெய்தற்கு அமையுமாறுபோல.

கருத்து:

அரசனால் மதிக்கப்பட்டார் ஏனையோராலும் மதிக்கப்படுவர்.

பொருளுரை:

அணிகலன்களை அணிந்திருக்கின்ற மார்பை உடையவனே! ஆண்டகைமையை உடைய அரசர்களைச் சேர்ந்து ஒழுகுபவர்கள் தாம் வறுமையால் மிக்க துன்பத்தை அடைந்தாலும் அவரிடத்தில் ஒன்றனை விரும்புகின்றோம் என்பதனை கூறாதொழிக பிறரால் மிக மதிக்கப்பட்டார் ஒரு பொருளையும் விரும்பிக் கேளாமையே அவர் விரும்பிய யாவற்றையும் தரும் ஆதலால்.

கருத்து:

அரசனைச் சார்ந்தொழுகுவார் தமக்கு ஒரு பொருள் வேண்டுமென்று அரசனைக் கேளா தொழிக என்பதாம்.

பொருளுரை:

அரசனைத் தனக்குத் துணையாகக் கொண்டு அவனைச் சார்ந்தொழுகினார் அவனால் ஏவப்பட்ட வேலையைச் செய்பவர்க்கு உதவிசெய்து அவரால் காரியம் பெறலாமென்று நினைத்தல் பசுவினை அணைந்து நின்ற பசுவின் கன்று தாயினது மடி யிருக்கவும தாயினது அணலைச் சுவைத்தாற் போலும்.

கருத்து:

அரசனைச் சார்ந்தொழுகுவார் கீழாயினாரிடம் கூறித் தங்குறையை முடித்துக்கோடற்க என்பதாம்.

பொருளுரை:

மிகுந்த புகழினையுடைய அரசர்க்கு உயிரை ஒப்பாரேயாயினும் புறத்தே உள்ள அமைச்சர்களைவிட அரண்மனையிலுள்ள கூனர்க்குச் செவ்வி வாய்த்தல் எளிது (ஆதலால்) எல்லாச் சிறப்புமுடைய அரசர்களை காண்டற்குரிய காலத்தை அறிந்துகண்டு திறம்படக் கூறுவார்க்கு முடியாதது ஒன்றுமில்லை.

கருத்து:

அரசனை சார்ந்தொழுகுவார் அரசனுடைய குறிப்பறிந்து கூறிக் காரியங் கொள்க என்பதாம்.

பொருளுரை:

நிழலிடுகின்ற குடையினை உடைய தேர்மன்னர் எமக்கு இது பொருந்தும் என்று மிகவும் அவர்கள் விரும்புவனவற்றை அவர்களைச் சார்ந்தொழுகுவார் விரும்பி முடியும்படி ஒன்றனையும் ஆராயாது முயற்சி செய்தல் கொடிய புலி முதலாயினவற்றைத் தன்மாட்டு அழைத்ததனோ டொக்கும்.

கருத்து:

அரசனைச் சார்ந்தொழுகுவார் அரசன் விரும்புவனவற்றை விரும்பாதொழிதல் வேண்டும்.

பொருளுரை:

பாம்பானது மிக்க சுற்றத்தினின்றும் நீங்கிப் போய்த் தனிப்பட்ட இடத்தும் இளையது என்று கருதிச் சோம்பியிருப்பார் இலர்; (அதுபோல) சீர்மை தக்க அரசர்களுடைய சிறப்பெல்லாம் கெட்டவிடத்தும் அவர் நிலைமையை நோக்கி மாறுபட்டுக் கூறி இகழாராகுக.

கருத்து:

அரசன் சீர்கெட்டவிடத்தும் அவனை இகழ்வார் தீமையையே அடைவர்.

பொருளுரை:

தருக்குடைய அரசர்களது இடையே புகுந்து அவர்களுள் ஒருவருக்கும் பயன்படாதவற்றை ஒருவன் சொல்லின் தன் சொல்லால் வேறுபட்ட அவர்களைத் திருத்தவும் முடியாது தீதாக விளையும் அங்ஙனங் கூறல் இரண்டு எருதுகளின் இடையேயுள்ள வைக்கோலை ஓர் எருது இடைப்புக்குத் தின்னலுறுதலை யொக்கும்.

கருத்து:

அரசர்களிடை ஒன்றனைக் கூறவிரும்புவார் ஒருவரைச் சார்ந்து நின்று கூறுக.

பொருளுரை:

பல நாட்கள் ஊழியஞ்செய்து அரசனுடைய பொருள்களைப் பற்றி உண்டு மகிழ்ந்தவர்கள் பின்னர் ஒருகாலத்தும் துன்பம் செய்யாதிருத்தலை விரும்பி அரசனுக்குத் தம்மிடத்துள்ள பொன்னைக் கொடுத்து அன்பால் ஒழுகுதல் குவளைமலரை அவற்றின் தண்டினாலேயே கட்டுதலோ டொக்கும்.

கருத்து:

அறிவுடையோர் அரசனிடத்துத் கொண்ட பொருளையே அவனிடத்துக் கொடுத்துத் தம்வயப்படுத்துவர்.

பொருளுரை:

மெய்யான நெறியின் கண்ணே நின்று அரசனால் நன்கு மதிக்கப்பட்டவர்கள் தமக்கு ஒரு காரியம் முடியும்பொருட்டு அவராணை கடந்துநின்று அவர் வெகுடற் கேற்பனவற்றை இயற்றி வஞ்சனையை ஏறிட்டுக்கொண்டு அந்த அரசனைக் கொன்றவர்கள் பனை தம்மேலே வீழும்படி வெட்டுகின்றவர் களோடொப்பர்.

கருத்து:

அரசனைக் கொன்றவர்கள் இறுதி எய்துவர்.

பொருளுரை:

எல்லாத் துன்பங்களையும் தமக்குச் செய்து தம்மிடத்து அகப்பட்டவிடத்தும் உறங்குகின்ற புலியை அவ்வுறக் கத்தினின்றும் எழுப்புவார்களோ? (இல்லை). (அதுபோல) கொடிய சினத்தையுடைய அரசன் தங்கீழ் வாழ்வார்க்குத் தீமையே செய்யினும் அவன் மனத்தில் கறுவுகொள்ளத் தக்கனவற்றை அவன்கீழ் வாழ்வார் ஒருசிறிதும் இயற்றுதல் வேண்டா.

கருத்து:

அரசன் தமக்குத் தீமை செய்யினும் அவற்குத் தீமைசெய்யா தொழிக.

பொருளுரை:

காட்டுப்பசுக்கள் துள்ளி மகிழ்ந்துலாவுகின்ற அழகிய மலைநாடனே! உற்றுக் கேட்பாயாக கோங்கமரத்தின் மீது ஏறினவர்கள் ஏமம் ஆரார் - பாதுகாவலை யடையார் (அதுபோல) தம்மைத் தாமே பாதுகாத்துக்கொள்ள முடியாதார் தாவிச்செல்லுகின்ற குதிரை பூட்டப்பெற்ற தேரினையுடைய அரசரைச் சினத்தல் என் கருதி?

கருத்து:

அரசனைச் சார்ந்தொழுகுவார் தாமுந்தூயராயிருந்து அரசனைத் திருத்துதல் நல்லது.

பொருளுரை:

செய்யத் தகாதனவற்றைச் செய்தவர்களை அரசன் புறத்தே பொறுக்காதவன் போன்றிருந்து உழையார் என்பது கருதி அகத்தே பொறுமை உடை யனாயின் அவன் (மீண்டும்) மனம் பொறா தமைவனவற்றை இடையீடின்றிச் செய்தல் கூனின்மேல் பெருத்து எழுந்த கட்டியை அதுஒக்குமன்றோ.

கருத்து:

அரசன் பொறுமை உடையன் என்பது கருதித் தீமை செய்யற்க.

பொருளுரை:

இயற்கை நுண்ணறிவு உடையார் ஒரு பொருளாகவும் மதிக்கப்படாதார் கூறிய பொய்யாகிய குறளையை அரசன் தெளியும் வகையினை ஆராய்ந்து கூறுவதல்லாமல் குறளை கூறினார் வெருளுமாறு எழுந்து அசைகின்ற மூங்கிலால் செய்யப்பட்ட பொய்யாகிய கால்கள் போன்று குறளை கூறுவாரோடு ஆடுதலிலர்.

கருத்து:

அரசனைச் சார்ந்தொழுகுவார், அவன் உண்மையினைத் தெளிய அறியுமாறு கூறுதல் வேண்டும்.