பழமொழி நானூறு சங்கம் மருவிய காலத் தமிழ் நூல் தொகுப்பான பதினெண் கீழ்க்கணக்கு நூல்களுள் ஒன்று. அதன் சிறப்புப் பாயிரத்தையும், கடவுள் வணக்கத்தையும் சேர்த்து நாலடியால் அமைந்த நானூற்றொரு (401) பாடல்களைக் கொண்டது.

பொருளுரை:

அழகிய குளிர்ந்த அருவிகளை உடைய மலைநாடனே! கால நெடுமையை நோக்கி நத்தை நீரைத் தன்னிடத்தே பாதுகாத்துக் கொண்டதுபோல தத்தமது பொருளையும் தம் சுற்றத்தாரிடத்துள்ள செல்வத்தையும் முற்படவே ஆராய்ந்து பின்னாளில் உதவும் பொருட்டு பொருளினைச் சேமித்துக் காவல்செய்க.

கருத்து:

பின்னாளில் உதவும் பொருட்டுப் பொருளினைச் சேமித்துக் காவல் செய்க.

பொருளுரை:

ஒலிக்கின்ற நீரை உடைய உப்பங்கழிகள் அலைவீசுதற் கிடனாய கடற்கரைச் சோலையை உடைய அழகிய கடல் நாடனே! தமது கையினின்றும் போய பொருளை மீட்டுத்தர அறிவாரில்லையாதலால் தம்மிடத்துள்ள பொருளை தாம் காவல் செய்யின் அல்லது தமக்குச் சிறந்தார் எனவும் உறவினர் எனவும் கருதி நம்பலாகாதார் கையின்கண் ஒருகால் மறந்தும் வைத்தல் இலர் அறிவுடையார்.

கருத்து:

ஒவ்வொருவரும் தந்தம் பொருளைத் தாமே பாதுகாத்தல் வேண்டும்.

பொருளுரை:

தேவர்களும் முற்காலத்து பாதுகாத்தும் அமிர்தம் கருடனால் கொள்ளப்பட்டமையால் நன்றாகக் காவல் செய்தலினும் யாரும் நெருங்கமுடியாத தக்க இடத்தின்கண் வைத்துக் காவல் செய்தலே நல்லது. (ஆதலால்) பொருந்தாத விடத்து ஓர் அரிய பொருளை வைத்தால் கண்ணிமையாது காவல் செய்யினும் காவல் செய்ய முடியாதாம்.

கருத்து:

பொருளை, யாரும் நெருங்கமுடியாத தக்க இடத்தின்கண் வைத்துக் காவல் செய்தல் வேண்டும்.

பொருளுரை:

வடிவாய் இல்லாத கடல் நீர்த்துளிகளைத் தூவுகின்ற கரையினைப் பொருகின்ற உப்பங்கழிகளையுடைய குளிர்ந்த கடல் நாடனே! ஒருவர் முயன்று வருந்தித் தேடிய ஒள்ளிய பொருளை காவல் செய்தலை இகழ்ந்து கீழ்மக்களிடத்து ஒப்புவித்தல் காக்கையைக் காவலாக வைத்த சோற்றினை ஒக்கும்.

கருத்து:

காத்துத் தருமாறு கீழ்மக்களிடம் ஒப்புவித்த பொருளைப் பின்னர்ப் பெறுதல் அரிதாம்.

பொருளுரை:

வளையல் பொருந்திய முன் கையையுடைய நல்லாய்! புதிதாக அலர்ந்த நெய்தலது நறுநாற்றம் கமழுகின்ற விரிந்த அலைகளையுடைய குளிர்ந்த கடல்நாடனே! முயன்று வருந்திச் சேர்த்த அத்திரண்ட பொருளை நற்குடியிற் பிறந்த மகன் அல்லாதவனிடத்து வைத்தல் கிழவெருதை உண்பித்த புல்லோ டொக்கும்.

கருத்து:

நற்குடிப் பிறவாரிடத்து வைத்த பொருள் பயன்படுதலில்லை.

பொருளுரை:

இனிய இயல்பையுடைய மையுண்ட அகன்ற கண்களையுடைய மாதே! தான் எளிதாகக் கொள்ளக்கூடிய முன்னால் உள்ள பொருளை பெற்றுக் காவல் செய்தலின்றி விரும்பாது வெறுத்திருந்து எளிதாகக் கொள்ள முடியாத காலத்து அப்பொருளை தேடிக்கொள்ளுதல் அங்ஙனந் தேடிக் கோடல் வெண்ணெயை மேலே வைத்து அஃது உருகிக் கண்களை மறைத்தபின் மயிலைப் பிடிப்பதோ டொக்கும்.

கருத்து:

எளிதாகக் கொள்ளக்கூடிய பொருளைக் கொள்ளாது அரிதாயவிடத்துப் பின்னர் அதனை வருந்திப் பெறுதல் மடமையாகும்.

பொருளுரை:

மடப்பம் பொருந்திய மான்போன்ற பார்வையையுடைய சிறந்த மயில் போல்வாய்! மெய்யான நெறியிலே நின்று உலக இயலை அறிந்தார் உண்மையாகவே கைவிட்ட ஒண் பொருள் யாதொரு கரியுமின்றிக் கடனாகத் தன் கையினின்றும் விட்ட ஒள்ளிய பொருள் மீட்டுத் தன் கையின்கண் வருதல் இல்லை என்று கூறுவார்கள் பிறர்க்குக் கடனாகக் கொடுத்த பொருளை மீட்டுப் பெற்றானெனப் படுவான் உறுதி கூறுதற்குப் பாம்புக் குடத்தைப் பெற்றவனேயாவா னாதலால்.

கருத்து:

யாதொரு சான்றுமின்றிக் கடன் கொடுத்தலாகாது.

பொருளுரை:

தாம் கடனாகக் கொண்ட ஒள்ளிய பொருளை பிறரிடம் தம் கையினின்றும் விட்டிருப்பார் அவரிடத்திற் சென்று எம்மிடம் கொண்ட பொருளைத் தரவேண்டு மென்று கேட்டால் தம்மோடு பகையினை மேற்கொண்டவரைப்போலத் தொடங்கி கடன் வாங்கியவர் சினத்தல் விளையாட்டாகச் செய்தவிடத்தும் மனதிற்குக் கசப்பாய்விடும்.

கருத்து:

கொடுப்பதாகக் குறித்த காலத்தில் தாங்கொண்ட பொருளைக் கொடாராயின் கடன்கொண்ட ஒண்பொருளை உடையார்க்கு மனக்கசப்பை உண்டாக்கும்.