பழமொழி நானூறு சங்கம் மருவிய காலத் தமிழ் நூல் தொகுப்பான பதினெண் கீழ்க்கணக்கு நூல்களுள் ஒன்று. அதன் சிறப்புப் பாயிரத்தையும், கடவுள் வணக்கத்தையும் சேர்த்து நாலடியால் அமைந்த நானூற்றொரு (401) பாடல்களைக் கொண்டது.

பொருளுரை:

உலகத்தினை அரசுசெய்த மாவலி தன்னோடு பொருந்தியிருக்கும் அமைச்சன் கூறியவற்றை அறியாதவனாய் மூவடி நிலம் கொடுப்பது எனக்கு எளிய செயலாகும் என்று சொல்லி செருக்கின்கண் மிக்கு தானமாக நீர்வார்த்துக் கொடுத்து உலகமெல்லாம் இழந்தான். (ஆதலால்) குற்றமுடைய காரியங்களைத் தொடங்குகின்றவர்களுக்கு தாமே தமக்குத் தேடவாராத துன்பங்கள் இல.

கருத்து:

குற்றமுள்ள காரியத்தைச் செய்யத் தொடங்குவார் தாமே தமக்குத் துன்பங்களை விளைவித்துக் கொள்வாராவர்.

பொருளுரை:

மலைகளிடத்து விளங்கிய அருவிகள் பாயும் மலை நாடனே! நல்ல குடியின்கட் பிறந்து நல்லனவற்றைக் கற்றாரும் (சில நேரங்களில்) ஆராய்தலிலராய்ப் பிழைபடச் சொல்லுவார்கள் நல்ல - குடியின்கட் பிறவாதார் (சொற்களிலுள்ள) இன்னாமையும் பிழைகளுமாகிய இயல்பின்மையை நினைந்து வருந்துவது எதுபற்றி? யாவரே யாயினும் சொல்லின்கண் சோர்வுபடாதார் இலர்.

கருத்து:

யாவர் மாட்டும் சொற்சோர்வு உண்மையான் கருத்து ஒன்றனையே நோக்குக.

பொருளுரை:

அழகிய குளிர்ந்த நீரை உடைய புகாரின்கண் உள்ள பூமியது அளவை அறியும்பொருட்டு சோழவரசன் மக்களைக் கேட்டான் அறிவு சான்ற ஒருவன் ஒருவன் களவினால் ஆண்டுவருகின்ற நிலத்தை எடுத்துக் கூற நாணி அதனை மறைத்து இத்துணையென்று வரையறுத்துக் கூறினானாதலால் தன் கண்ணாற் கண்டு தெளிய அறிந்ததனையும் ஆராய்ந்து சொல்லுக.

கருத்து:

கண்ணாற் கண்டவற்றையும் அவற்றது நன்மை தீமை கூறுபாடு அறிந்தே கூறுக.

பொருளுரை:

ஒருவன் ஆராயாது மாறுபட்டுச் சினந்து எழுந்தபோரின் கண் அவ்விருவருக்கும் இடையே நட்பாக்கும் பொருட்டுப் புகுந்தால் தன் சொற்களைக் கேளாது மிக்க வெறுப்பினால் மீண்டும் போர் தொடுக்கும் உள்ளத்தராயின் எருதின் தலையிலுள்ள குறிய கயிற்றைப்போல் திருத்த முடியாதாம்.

கருத்து:

தன்சொல் கேளாதவரைத் திருத்தப் புகலாகாது.

பொருளுரை:

இனமாகிய ஆண் குரங்குகள் தேன் கூடுகளைக் கிழிக்கும் ஓங்கிய கற்கள் சூழ்ந்திருக்கின்ற மலைநாட்டை உடையவனே எனைப் பலவேயாயினும் - எத்துணைப் பலவேயாயினும் சேய்த்தாற் பெறலின் நெடுநாட்களுக்குப்பின் பெறுதலைவிட தினையளவிற்றாயினும் அணித்த நாட்களுக்குள் பெறுதல் நல்லது பனம்பழத்தை நட்டுவைத்துப் பனை பழுத்தால் அப்பழத்தை உண்போம் என்றிருப்பார் யாருமில்லையாதலான்.

கருத்து:

பயன் சிறியதேயாயினும் அணித்தே வருவதைக் கொள்க.

பொருளுரை:

(ஒரு காரியத்தைச் செய்ய) மனம் விரும்பிய இடத்தும் அது வழக்கத்தில் வராவாயின் அதனைச் செய்யார் அறிவுடையோர் நூல்கள் ஆகாவென் றுரைத்தனவற்றை உறுதிகொண்டு அவற்றைக் காத்தல் வேண்டும். நூல்கள் ஆகாவென உரைத்தனவும் மக்களால் விரும்பப்படுவனவாயின் அவற்றைச் செய்தல் வேண்டும். இனங் கழுவு ஏற்றினார் இல் - நூல்களோடு மாறுபட்டுக் கூறுகின்றனர் என்று மக்களைக் கழுவின்கண் ஏற்றினார் உல்கத்தில் இல்லை ஆதலான்.

கருத்து:

உலக நடையினை யறிந்து அதற்கொப்ப ஒழுகுக.

பொருளுரை:

நீர் சுருங்கி இறங்கிப் போகலாம் படி அளவுபட்டிருக்க அந்நெறியில் இறங்கிப் போதலை ஒழித்து தலை மிகவும் கிழிபட்டு கால்களும் வலி இழந்து நடத்தலைச் செய்யா வென்றும் சொல்லப்பட்டு முடம் என்ற பெயரோடு வேறு பெயர்களையும் அடைதலால் (அத்தகைய நெறியின்கண்) அறிவுடையார் செல்லுதலிலர்.

கருத்து:

தம்உயிர்க்கு ஏதம்பட வருவன செய்யாதொழிக.

பொருளுரை:

பெறுதற்கரிய ஒருவன் இருக்க இடம் பெற்றால் படுத்தற்குரிய இடத்தையும் பெற்றுவிடுவான்; (அதுபோல) செல்வரை அடைந்தவர்கள் முன்னர்ச் சிறிய அளவிற்றாய கூழினைப் பெற்று பின்னர் மிகுந்த அளவிற்றாய உணவினையும் பெறுவர்.

கருத்து:

தக்கவர்களைச் சார்ந்தொழுகின் மிகுந்த பயனை அடையலாம்.

பொருளுரை:

ஒருவனை வன்சொல் இடருட் படுத்துவதல்லது இனியசொல் இடருட் படுத்துவது இல்லை. (ஆகவே) இன்னாத சொல்லாலும் இனிய சொல்லாலும் வரும் பயனைக் குற்றமின்றி அறியவல்லார் வன்சொற் சொல்லி அதன் வழியே ஒழுகுபவராய் வாழ்ந்திருத்தலும் உண்டோ.

கருத்து:

இனிய சொற்களைச் சொல்லுக.

பொருளுரை:

உண்மையான நீர்மையை உடையராகித் தமது குண மேம்பாடுகள் விரிந்து நிற்கக் காரியத்தின்கண் புகுகின்றவர்களுக்கும் பொய்ம்மையான நீர்மை உடையராகித் தாங் கருதிய பொருளை முடிப்பார்க்கும் அவர்கள் காரியம் முடிக்கும்பொருட்டு எந்த நீர்மை உடையராய் ஒழுகினும் ஒழுகுக ஏனைய காலங்களில் ஒவ்வொருவரும் தத்தமக்குரிய ஒழுக்கினராய் ஒழுகுதல் தலைசிறந்தது.

கருத்து:

ஒவ்வொருவரும் தத்தமக்குரிய ஒழுக்கினை விடாராய் ஒழுகுதலே தலைசிறந்தது.

பொருளுரை:

சித்திரப் பாவையது தன்மை பொருந்தித் தோன்றும் நல்லாய்! நீண்ட வேலைத் தொலைத்தா னொருவன் குடத்துள்ளேயும் நாடுவான் (அதுபோல) கெடுத்ததொரு பொருளையுடையார் எத்தகைய சிறந்த அறிவினை யுடையவராயினும் முன்னிற்பார் தேவர்களேயானாலும் தமது பொருளைக் கைக்கொண்டாரெனத் தீமையாக நினைப்பர்.

கருத்து:

பொருளினை இழந்தார் ஆராயாது ஐயுறுவராயின் அது நோக்கி அவரைவெறுக்காது பொறுத்தல் வேண்டும்.

பொருளுரை:

வேலினை ஒக்கும் கண்களை உடையாய்! பித்தரும் உறங்குகின்ற அரையாமத்தில் கதவு முதலியனவற்றைத் தகர்த்தல் செய்து அக்களவான் வரும் உணவினை உண்ணுதலே தொழிலாகக் கொண்டு ஞாயிறு எழுந்து வெயில் விரிந்த பொழுதின்கண் உறக்கம் நீங்கி வெளியே தோன்றினவர்களாகி எல்லார்க்கும் தாம் நட்டார் போன் றறிவித்து (நிற்கும்) மயிலைப் போன்ற கள்வர்களை உடைத்தாயிரா நின்றது இவ்வுலகம்.

கருத்து:

வஞ்சக் கள்வரை மிக உடையது இவ்வுலக மாதலால் அவரை யறிந்து தம்மைப் பாதுகாக்க என்பதாம்.

பொருளுரை:

தம்மை அடைக்கலமாக அடைந்தார் துன்புற்று அவலிக்குமாறு தீயவழியில் செல்லா தொழிக இருவகைப் பற்றினையும் நீத்தார் அறிவுறுத்திய நெறியின்கண் செல்லாது அதனைவிட்டு நில்லாதொழிக தான் ஆராய்ந்து அறிந்த நுண்ணிய பொருளை பலமுறையும் ஆராய்க உலகத்தார் செல்கின்ற நெறியின் கண்ணே யாரையும் வினவுதலின்றிச் செல்க.

கருத்து:

(1)தம்மை அடைக்கலமாக அடைந்தாரைத் துன்புறுத்தலாகாது. (2) துறவிகள் அறிவுறுத்திய நெறியில் ஒழுகல் வேண்டும். (3) தான்கண்ட நுட்பத்தைப் பலகாலும் ஆராய்க. (4) உலகத்தோ டொத்து வாழ்.