பழமொழி நானூறு சங்கம் மருவிய காலத் தமிழ் நூல் தொகுப்பான பதினெண் கீழ்க்கணக்கு நூல்களுள் ஒன்று. அதன் சிறப்புப் பாயிரத்தையும், கடவுள் வணக்கத்தையும் சேர்த்து நாலடியால் அமைந்த நானூற்றொரு (401) பாடல்களைக் கொண்டது.

பொருளுரை:

எமக்கு ஓர் இடர் வந்தால் அதனைக் களைந்து துணை செய்வோர் வேண்டுமென்று நினைத்து தமக்கு உதவி செய்வோரைத் தாம் ஆராய்தல் வேண்டா பிறர் ஒருவருக்குப் பிறரால் செய்யத்தக்கது ஒன்று உண்டோ? துணை யாவாரைக் கண்டிடினும் ஒரு சிறிதும் நன்மை விளைதல் இல்லை தம் நோயைத் தடுப்பார் தாமே யாவர்.

கருத்து:

நமக்கு வேண்டிய நன்மையை நாமே தேடிக் கொளல் வேண்டும்.

பொருளுரை:

பொருந்தி ஆரவாரிக்கும் பிரளய கால வெள்ளம்போல் பரக்கும் நீரையுடைய கடல்நாடனே! படித்தறிந்தது ஒரு சிறிதும் இல்லையாயினும் தொடங்கிய செயலைச் சோம்பலின்றி முடிப்பவன் அறிவுடையானெனப்படுவான் அங்ஙனம் செயலை ஆற்றுவோன் ஆண்டில் இளையவனேயானாலும் அறிவில் முதிர்ந்தவன் எனப்படுவான்.

கருத்து:

நூலறி வில்லானேயாயினும் கருமச் சூழ்ச்சியறிதலின், எடுத்த செயலை முடிப்போன் அறிவுடையா னெனப்படுவான்.

பொருளுரை:

தம்மோடு தொடர்பில்லாதவர்களுக்கு வேண்டிய உதவியைச் செய்து விருந்துஓம்பி தம்மோடு தொடர்புடையராய் வந்த விருந்தினரை உபசரித்து கொடிய போரிடத்து வாளால் செய்யும் ஆண்மையிலும் வலிமையுடையராய் முயற்சியைக் குறைவிக்கும் சோம்பலைக் கொள்ளாதவராய் வருந்திச் செய்யாதவர்களது மனைவாழ்க்கை செப்பம் அடைதல் இல்லை.

கருத்து:

வேளாண்மை, விருந்தோம்பல், வாளாண்மை, தாளாண்மை முதலியன மனைவாழ்க்கை யுடையார்க்கு வேண்டு மென்பதாம்.

பொருளுரை:

உள்ள பொருள் ஒன்றே யென்றும் அதுவும் சிறியதே என்றும் எடுத்த செயலை முடிப்பதற்குப் போதிய உதவி இல்லையே என்று நினைத்துச் சோம்பி இருப்பின் குற்றம் பெரிதாகும் தம்மிடத்துள்ள பொருளைப் பிறர்க்குக் கொடுத்தும் பிறரிடத்துக் கொடுத்த பொருளைத் தாம் மீளக் கொண்டும் எவ்விதத்திலும் முயற்சி செய்யாதவர்கள் ஒருநாளின் உள்ளேயே அழிந்துவிடுவர்.

கருத்து:

ஒருவன் சோம்பலுடையவனா யிருப்பின், அதனால் மிகுந்தகுற்றங்கள் உளவாம்.

பொருளுரை:

இப்பொழுது சார்வாக ஒருவரையு மில்லாதார் எம்மைவிட யாருளர் இவ்வுலகத்தில் தனிமையுடையவராக ஆயினோம் என்று கருதி ஒருவர் சோம்பியிருக்க வேண்டுவதில்லை எடுத்த காரியத்தின்கண் சோர்வு இல்லாதவராகி முயற்சி செய்க காரியத்தின்கண் வெறுப்பில்லாதவர்கள் தாம்நினைத்ததை அடையாமலிருத்தலில்லை யாதலால்.

கருத்து:

தொடங்கிய காரியத்தில் சோம்பலும் வெறுப்பும் இன்றி அதனைச் செய்தல் வேண்டும்.

பொருளுரை:

தன்னால் இக்காரியங்கள் முடியுமாவென்று முதலில் ஆராய்ந்து, தனக்குத் துணையாவாரையும் ஆராய்ந்து செய்தால் உளவாம் பயனையும் ஆராய்ந்து அறிவிற் சிறந்தோர் அவற்றை மேற்கொள்வர் அங்ஙனம் ஆராய்தல் இல்லாமல் இயலாத செயல்களுள் யாதானும் ஒன்றை மேற்கொண்டு செய்யும் முறை யறியாது ஏதாவது செய்தால் தான் தான் நினைத்ததின்றி அதற்கு மாறாகித் துன்பமே உண்டாகும்.

கருத்து:

எக்காரியத்தையும் ஆராய்ந்தே தொடங்க வேண்டும்.

பொருளுரை:

பருத்த தோளை உடைய சோழனது சினம் மிக்க ஆகாயத்தின்கண்ணே அசைந்து கொண்டிருந்த அசுரர்களது ஊரினைத் தேவர்கள் பொருட்டுத் தொலைவித்தலால் எவ்வளவு முடியுமோ முடியும் வழியால் முயற்சி செய்க. கூர் அம்பு அடி இழுப்பின் இல்லை அரண் - கூரிய அம்பு அடியானது பொருந்த மிக விரைவாகத் தொடுப்பின் அதனைத் தடுத்தற்குரிய கவசம் இல்லையாதலால்.

கருத்து:

நம்மால் முடிந்த அளவும் முயற்சி செய்தால் முடியாதகாரியம் ஒன்றில்லையாம்.

பொருளுரை:

எம்மிடத்து ஒரு பொருளும் இல்லை எமக்கோ சுற்றத்தாருமில்லை என்று நினைத்து ஒருவர் தம்மிடத்துவரும் பெருமையை அழிக்கக் கூடியனவற்றைச் செய்யாதொழிக எங்கே பிறந்தவர்க்காயினும் மிகவும் முன்கை நீளமாக உடையவர்கட்கு தோள்கள் மிகவும் திரட்சியுற்றுப் பெரியனவா யிருக்கும்.

கருத்து:

பெருமையை அழித்தற் குரியனவற்றைத் தாம் செய்யாதிருக்க வேண்டும். அதனால் மிக்க புகழ் உண்டாகும்.

பொருளுரை:

நிலத்தின்கண் வாழ்வதற்கு மிகுதியாகிய பெரிய செல்வத்தை விரும்பி நன்மை மிகுந்த அரசர்களுள் நல்லோர் ஒருவரை அடைந்து (அங்குத் தங்கியிராமல்) நிலத்து நிலைகொள்ளா காலர் - ஓரிடத்தும் தங்குதலைக் கொள்ளாத கால்களை உடையவர்கள் ஆராயுமிடத்து உலக்கை மேலுள்ள காக்கை என்று கூறப்படுவார்கள்.

கருத்து:

அறிவிலார் ஒருவரிடத்திலும் ஒரு தொழிலிலும் நிலைபெறாது வருதலால் நன்மையைப் பெறமாட்டார்கள்.

பொருளுரை:

மேற்கொண்ட தமது செயலை தாம் சோம்பல் கொண்டு நடத்தி முடிக்கும் உறுதியைவிட்டு செருக்கில் மிகுந்து ஓடித்திரியின் தாம் மேற்கொண்ட அச்செயல் மிகவும் சிதைந்து தன்னைச் செய்வதாக மேற்கொண்டவனிடத்தில் தவ்வையை அறிமுகப்படுத்தும்.

கருத்து:

முயற்சி இல்லதானை மூதேவி அடைவாள்.

பொருளுரை:

பரந்து செல்கின்ற அருவியை உடைய மலைநாடனே! தம்மால் முடிக்கலான தொரு செயலை தாம்செய்து முடிக்கமாட்டாதவராய் பிறகு வேறொருவரால் செய்வித்துக் கொள்வோம் என்று சோம்பியிருத்தல் வெந்நீரினும் குளியாதார் தீயின்கண் பாய்வார்களோ? (இல்லை. அதுபோல அதுவுமில்லையாம்.)

கருத்து:

தம்மால் முடியும் செயலைத் தாமே செய்தல் வேண்டும்.

பொருளுரை:

முழுதுலகத்தையும் முன்னே உண்டாக்கியவன் நமக்காக அல்லலையும் படைத்தான் என்று நினைத்து இஃது அவனாலேயே நீங்கும் போலுமென்று நினைத்து அவனையே தொழுதுகொண்டு முயற்சியின்றி யிருப்பின் துன்பம் நீங்குமோ? முன்னம் ஓலை பழுது எழுதினான் - முதலில் ஓலையைப் பழுதுபட எழுதியவன் தாம் குற்றம் செய்தவனாக அறிந்தபின் செய்த குற்றத்தைப் பாதுகாப்பதில்லை. (உடனே நீக்குவன் என்பதாம்.)

கருத்து:

துன்பம் தெய்வத்தால் வந்ததாயினும் அதனை நீக்க முயற்சி செய்க.

பொருளுரை:

முடிந்த செயலுக்கு முயற்சி செய்ய வேண்டுவதில்லை முடிவுறாது இடையே முறிந்த செயலுக்கு ஆக்கமில்லை (அவைபோல) குற்றமறச் செய்யவல்லதற்குச் செய்யும்பொழுது துன்பம் ஏற்படுதல் இல்லை உலகில் இல்லாத பொருள்களுக்குப் பெயர்கள் இல்லையாதலால்.

கருத்து:

தம்மால் முடியுஞ் செயலை யாவருஞ் செய்க. அதனால் துன்பம் உண்டாகாது.