பழமொழி நானூறு சங்கம் மருவிய காலத் தமிழ் நூல் தொகுப்பான பதினெண் கீழ்க்கணக்கு நூல்களுள் ஒன்று. அதன் சிறப்புப் பாயிரத்தையும், கடவுள் வணக்கத்தையும் சேர்த்து நாலடியால் அமைந்த நானூற்றொரு (401) பாடல்களைக் கொண்டது.

பொருளுரை:

இயமன் ஆராய்ந்து உயிரை உண்ணும் பொருட்டு விரும்பித் திரிவானேயாயினும் தான் உண்ண வேண்டிய காலம் வருமளவும் உயிரைப் பாதுகாத்து நிற்பான். (அதுபோல) கண்ணினுள்ளேயிருக்கும் கருமணியைப்போல் தம் கருமத்தின்மேல் உள்ள ஆசையால் தம்மோடு நட்புச் செய்தவர்களும் தமக்கு ஆக வேண்டிய கருமம் முடிந்தது என்று நினைத்த அளவில் முன்னர் இருந்தவராக அன்றி வேறொருவராக நிற்பர்.

கருத்து:

கீழ்மக்கள் தாம் காரியம் முடியுமளவும் அதை முடிக்கவல்லாருடனிருந்து முடிந்தவுடன் விட்டு நீங்குவார்கள்.

பொருளுரை:

பசுமையான பொன் வளையலை உடையாய்! தளர்வு வந்த இடத்து வைத்த பெருநிதியை ஒப்ப உதவி செய்வர் எனக் கருதி நம்மால் விரும்பி நட்புக் கொள்ளப்பட்டவர் நமக்கு ஓர் இடையூறு வந்துற்ற விடத்து ஒரு சிறிதும் உதவிசெய்யாதவராகி அச்சம் காரணமாக மறுத்தொழுகின் அச் செய்கை ஒருவனை மச்சின்மீது ஏற்றி ஏணி நீக்குதலை யொக்கும் அல்லவா!

கருத்து:

தம்மையே அடைக்கலமாக நினைத்து அடைந்தவர் ஒரு தீதுற்றால் தமக்கு இறுதி பயப்பினும் அவர்க்கு முன்னின்று உதவுதல்வேண்டும்.

பொருளுரை:

பாம்புக் கொடியை உடைய துரியோதனனுக்கு போர் ஏற்பட்டவுடன் அதற்குதவாது சென்ற பால்போன்ற உடம்பினையுடைய பலராமனைப் போல வழி வழியாகத் தம்மோடு நட்பினைச் செய்தார் பொருட்டு மிகத் துன்புறுத்தும் போரின்கண் கலத்தலிலராய் அவர் உயிரைப் பகைவரால் போகச் செய்து இறந்தார் பொருட்டு நீத்தார் கடனைச் சிறப்பாகச் செய்பவர்கள் கழிந்த விழாவினை உடைய ஊரில் தம் புதல்வற்கு விழாக்காட்டும்பொருட்டு அவரைத் தோள்மீது சுமப்பாரோடொப்பர்.

கருத்து:

நட்டார் துன்புற்றபோது அவர்க்காவன செய்யாது அவர் இறந்தபின் சிறப்புச் செய்தல் கீழ்மக்களது செய்கையாகும்.

பொருளுரை:

மேம்பட்ட குணங்களை உடையவர்கள் கோள் கூறிய இவர்கள் நம் நட்டாரோடு மாறுபாடு உடையவர் என்று நினைத்து அவர் கூறியனவற்றை ஆராய்ச்சி செய்து குற்றம் காண்பதிலர் கடைப்பட்ட குணங்களை உடைய கீழோர் தம் நட்டார் மேல் பிறர் வந்து கூறும் கோள்களை ஆராய்ச்சி செய்து அவர் குற்றங்களைக் காண்டலின் அறிவிலாரோடு கொண்ட நட்பு பின்னர் இன்னாததாக முடியும்.

கருத்து:

அறிவுடையோர் நட்டார் குற்றத்தைக் காணமாட்டார்கள், அறிவிலார் அவர் குற்றத்தை ஆராய்ந்து காண்பார்கள்.

பொருளுரை:

மான்போன்ற (மருண்ட) நோக்கினை உடையாய் தாம் மனத்தால் நட்புப்பூண்டு சுற்றத்தார் என்னும்படி ஒழுகியவிடத்தும் தம்மால் நட்பாகக் கொள்ளப்பட்டார் மனதின் கண் நாணம் இல்லாது அந்நட்பால் என்ன பயனுண்டாம்? மறந்தும் மனத்தால் நட்புச்செய்த அவர்கள் மறந்தும் இரங்குதல் இலர் அந்நட்பு (அனுபவித்தற்குரிய மக்களில்லாத) காட்டில் எறித்த நிலவினை ஒக்கும்.

கருத்து:

கீழ்மக்களோடு கொண்ட நட்புப் பயனற்று ஒழியும்.

பொருளுரை:

(முன்னரே அறிந்து வைத்தும்) கண்டு அறிவார் போலாராகி நட்பு இன்மையை உண்டாக்குவாரை தாமும் முன்னரே அறிவார்போன்று இல்லாது அவர் நட்பின்மையை உண்டாக்கியது போல அவரின் பிரிந்துநீங்கி நட்பினை மாற்றிவிடுக அச்செய்கை தன்னிடத்துப் பூண்ட அன்பினை நீக்கியதனுக்குத் தானும் அதுநீக்குதல் மருந்தாமாறு போலாகுமல்லவா!

கருத்து:

தம்மை நன்றாக அறிந்திருந்தும் அறியாதார் போன்றுநடிப்பார் நட்பு விடுதற்குரியதாகும்.

பொருளுரை:

தம்மிடத்தில் மிகுதியாக நட்புப் பூண்டவர்க்கும் அவரது பகைவர்க்கும் அவரிடத்திற் சென்று மனவேறுபாடு இன்றி மிகவும் நட்டார்போன்று நின்று அவர்களது பகைமையை வளர்க்கும் சொற்களைச் சொல்லி அவர்களுள் ஒருவரோடு மனம் பொருந்த இருந்து உறுதியாயின செய்ய மனமியையாதார் இருகடையாலும் சுடுகின்ற கட்டை என்று சொல்லப்படுவார்.

கருத்து:

ஏற்பன கூறி இருவரது பகைமையை வளர்த்தல் அறிவிலாரது இயல்பு.