பழமொழி நானூறு சங்கம் மருவிய காலத் தமிழ் நூல் தொகுப்பான பதினெண் கீழ்க்கணக்கு நூல்களுள் ஒன்று. அதன் சிறப்புப் பாயிரத்தையும், கடவுள் வணக்கத்தையும் சேர்த்து நாலடியால் அமைந்த நானூற்றொரு (401) பாடல்களைக் கொண்டது.

பொருளுரை:

மிகப் பெருகி நன்மை மிகுதலான நன்னீர் கடலில் வீழ்ந்தாலும் தன்னிடத்துள்ள உவர்ப்பு நீங்காத ஆரவாரிக்கும் கடலைப்போல் கீழ்மக்கள் மிகவும் நல்லோரினத்தோடு சேர்ந்து வாழும் நன்மையை நன்றாகப் பெற்றிருந்தாலும் எப்பொழுதும் மனத்தின்கண் தூய்மை பெறுதல் இலர்.

கருத்து:

கீழ்மக்கள் பெரியார்இணக்கம் பெற்றிருப்பினும் மனச்செம்மை அடையார்.

பொருளுரை:

மீன் உண்ணும் கொக்குகள் நிறைந்திருக்கின்ற நீர்வளம் பெற்ற வயல்களை உடைய மருதநிலத் தலைவனே! சர்க்கரையோடு கலந்திருக்கின்ற மணலை சர்க்கரையென்று கருதி உண்ணலாமோ; (அதுபோல்) தகுதி உடையாரோடு பொருந்தி அவர் உறவினரைப்போல் நெருங்கி ஒழுகினார் (ஆதலால்) குணத்தினால் மிக்கவர் என்று அறிவிற் சிறியாரை பெரியோர்கள் தெரிந்து நட்புக் கொள்ளார்.

கருத்து:

சிறியார் பெரியாரோடு இணங்கியிருப்பினும் அவரோ டிணங்கார் அறிவுடையோர்.

பொருளுரை:

வலிமை தங்கிய மலைபோன்ற மார்பையுடையாய்! நத்தையாற் கீறப்பட்டன யாவும் எழுத்து ஆகுமோ? (ஆகா) (அதுபோல) தம்முடைய தொழில் திறமையுற நடாத்தும் தன்மையுடையார் செய்கின்ற செயல்கள் கொடுஞ்செயலை உடையாராகிய சினமுடையவர்களுக்குச் செய்தல் இயலுமோ? (இயலாது).

கருத்து:

மேன்மக்கள் செய்யும் காரியங்கள் கீழ்மக்களுக்குச் செய்ய இயலா.

பொருளுரை:

பூத்தவிடத்தும் காய்க்கப்பெறாத பாதிரி முதலாகிய மரங்கள் உள்ளன வயது முதிர்ந்தாலும் நல்ல நூல்களை அறியாதவர்கள் தாம் மிகுதியும் உளர் எருவிட்டு வரம்பு கட்டப்பட்ட பாத்தியில் விதையினை விதைத்தாலும் முளைக்காத விதைகளும் உள. (அவைபோல) அறிவில்லாதவனுக்கு அறிவுரைகளை உரைப்பினும் உண்மை உணர்வு அவனுக்குத் தோன்றாது.

கருத்து:

பேதைக்கு அறிவு ஊட்டுதல் இயலாது.

பொருளுரை:

ஆராய்ந்துவைத்த கருத்தும் உண்மையை அறியும் அறிவும் அறியாத மூர்க்கர்களுக்கு ஒரு பொருளையும் சொல்லாதொழிக. நீலம் உண்டது பிறிது ஆகாது - நீல நிறத்தை உண்டபொருள் வேறொரு நிறத்தைக் காட்டுதல் முடியாது. (அதுபோல) மூர்க்கன் தான் மேற்கொண்டதனையே மனத்தின்கண் கொண்டு விடான்.

கருத்து:

மூர்க்கர்கள் பிறர் கூறுவனவற்றைக் கேட்டுத்திருந்தார்.

பொருளுரை:

தெளிவாக நண்பு பூண்ட ஒருவரை ஒருவர் பொல்லாங்குரைக்கும் உரையைக் கேட்டால் நம்மையும் இப்பெற்றியே உரைப்பார் என்று கருதி அவரை நம்பாதொழிக உண்பவர்கள் தேவர்களேயானாலும் வேம்பு கசக்குந் தன்மையது. (அதுபோல) நட்புப் பூண்பவர்கள் மிகவும் சிறந்தவர்களாயினும் அவர்களோடு நன்றாக ஒழுகுதல் இலர்.

கருத்து:

தீயவரை நட்பாகக்கொண்டு ஒழுகுதல் கூடாது.

பொருளுரை:

தினந்தோறும் கையின்கண் இருந்து வளர்ந்தாலும் காடைக்கு மனம் காட்டில் வசிப்பதிலேயே பொருந்தியிருக்கும். (அதுபோல) காட்டின்கண் வசிக்கும் வாழ்க்கையால் கொடிய தொழில்களைச் செய்கின்ற விலங்கொப்பாரை நாட்டின்கண்ணே தங்கவிடினும் நன்னெறியில் ஒழுகார்.

கருத்து:

கீழ்மக்கள் என்ன செய்யினும் திருந்தப்பெறார்.

பொருளுரை:

பெரிய புன்னையது பூக்கள் புல்லிய புலால் நாற்றத்தைப் போக்கும் கடற்றுறையை உடையவனே! உண்ண விரும்புவது உண்ணப்படும் பொருளின் துன்பத்தைக் கண்டு அஞ்சுவதில்லை (அதுபோல) கொடிய தொழில்களைப் புரிவோராகிய கீழ்மக்கள் தம்மீது மிக்கபழிசேறலைப் பொருட்படுத்தார்.

கருத்து:

கீழ்மக்கள் பழிக்கு அஞ்சார்.

பொருளுரை:

மணல் மேடுகளில் அடும்பின் பூக்கள் மலரும் கடல் நாடனே!' மிகுதியான பழிச்செயல்களை மிகவும் செய்தால் அது தீர்த்தற்குத் தக்கதனை அறியாராய் மீண்டும் பழிக்குரிய அச்செயல்களிலே சிறந்து விளங்குதல் ஊரினரால் அழிக்கப்பட்ட நீரில் ததும்புமாறு நீரை வாரி எறிந்து அதனால் மூழ்கிவிடுதலை ஒக்கும்.

கருத்து:

செய்த பழியை நீக்க அறியாது பின்னும் அது செய்தல் ஊர்வாரி நீரிலேபடிந்ததை ஒக்கும்.

பழியொடுபட்ட வாழ்வு பயனற்ற வாழ்வு. 'அகலுள் நீராலே துடும்பல் எறிந்து விடல்' என்பது பழமொழி.

பொருளுரை:

மாட்சிமையில்லாத பகைவர்களை எதிர்த்து நின்று தண்டிக்க முடியாதவர்கள் தம் பகைவரைப் பொருட்படுத்தாது பிறர் இகழ்ந்து கூறும் சொற்களைக் கேட்டு மகிழ்ந்தவர்களைப் போன்று உணவாக உண்டு அதனால் அடையும் பயன் ஒரு சிறிதும் இல்லை யெனினும் கள்ளினைக்கண்ட அளவில் மகிழும் கீழ்மகன்.

கருத்து:

கீழ்மகன் கள்ளினைக் கண்ட அளவிலேயே மகிழ்வு எய்துவான்.

பொருளுரை:

ஒலிக்கின்ற கண்ணை உடைய முழவுபோல் ஆரவாரிக்கும் குளிர்ந்த கடல் நாடனே! தம்மொடு வருந்திப் போந்த நட்பினையும் பாராது தண்டித்தமையை அறிந்திருந்தும் அவரிடத்து விருப்பமுடையார் போன்று தீய செயல்களைப் பின்பும் செய்தொழுகுதல் சாண் நீளமுள்ள தொன்றனைக் குறைக்க அது முழம் நீளமாக நீளுவது போலும்.

கருத்து:

தீயவர்களைத் தண்டித்தாலும் பின்னரும் தீமையேசெய்ய முற்படுவர்.

பொருளுரை:

(கீழ்மக்கள் வறுமையுற்ற இடத்து அது காரணமாகத் தீமையைச் செய்துண்பார்கள் செல்வம் உற்ற இடத்து செல்லும் நன்னெறியை அறியாதவர்களாகி அறத்தைக் கெடுத்து ஒழுகுவார் கல்லாத கீழ் மக்களுக்கு நன்மை என்பதில்லாததுபோல நரியினுக்கு உணவு பெறுகின்ற நல்லகாலமும் பெறாத பஞ்ச காலமும் இல்லை.

கருத்து:

கல்வியறிவில்லாத கயவர்கள் எக்காலமும் தீமையையே புரிந்தொழுகுவார்கள்.

பொருளுரை:

ஊரில் வாழ்பவர்களால் அறியப்படாத பொலி காளை இல்லை (அதுபோல) உண்மை ஞானம் உடையார் வாயால் சொல்லும் நற்குணம் உடைய சொற்களை மனத்துட் கொள்ளாது. கார் அறிவு கந்து ஆ(க) - அஞ்ஞானத்தைப் பற்றுக்கோடாகக் கொண்டு தீய செயல்களைச் செய்தொழுகுவோரை அவரது பேரினை அறியாதவர்களாகிய அறிவிலிகள் யாவர் உலகத்துளர். (இல்லை.)

கருத்து:

கயவர் எல்லோராலும் அறியப்படுவர்.

பொருளுரை:

மரங்கள் மிக்குச் செறிந்த சோலைகள் சூழ்ந்த மலைநாட்டிற்கு உரியவனே குரங்கினங்களுள் நல்ல முகத்தை உடையவை இல்லை; (அதுபோல) நிரந்து வழிவந்த - பெருகி வழிவழியாகவந்த தீயகுணமுடையாரெல்லாருள்ளும் பெருக ஆராய்ந்து ஒருவரைத் தேறும்பொழுது நல்ல குணமுடையார் காணப்படார்.

கருத்து:

கீழ்மக்களுள் நல்லோர் காணப்படார்.

பொருளுரை:

யாழிசையைப் போன்ற இனிமையான மழலைச் சொல்லை உடையாய்! முறைப்படியே தமக்கு நன்மை செய்வாரை நீக்கிவிட்டு பயன்படாத கீழ்மக்களைத் தம்மோடு மிகுதியும் சேர்த்தல் தேன் நிறைந்த பலாமரத்தை வெட்டி அவ்விடத்தில் எட்டி மரத்தை வைத்து நீர் முதலியன கொண்டு வளர்த்து விடுதலோடொக்கும்.

கருத்து:

கீழ்மக்களைத் தம்மோடு சேர்த்துக் கொள்ளுதல் துன்பத்திற் கேதுவாம்.

பொருளுரை:

பொறிவண்டு பூமேல் இசை முரலும் ஊர புள்ளிகளையுடைய வண்டுகள் பூக்களின்மீது இருந்து இசை பாடும் மருதநிலத் தலைவனே! அறிவிற் பெரியார்க்குச் செய்யும் சிறப்பினை விரும்பி அறிவிற் சிறியார்க்குச் செய்தல் அச்செயலன்றோ யானைமேல் இடவேண்டிய கல்லணையை இழிந்த நாயின்மீது இட்டதை ஒக்கும்.

கருத்து:

பெரியோர்க்குச் செய்யும் சிறப்பினைச் சிறியோர்க்குச் செய்தலாகாது.

பொருளுரை:

துன்பம் நீங்குமாறு மிகவும் அன்பு செய்து குற்றம் அற்றவைகளைச் செய்யாதவராய் செல்வத்தால் மிகப்பெருகி வாழ்ந்தாலும்; மாசு அற மாண்ட மனம் உடையர் ஆகாத கூதறைகள் - குற்றம் அற மாட்சிமைப்பட்ட மனமுடையராகாத கூளங்கள் நற்குடியிற் பிறந்தவராகார்.

கருத்து:

கீழ்மக்கள் செல்வம் பெறினும் மனத்தூய்மையிலராகலின் உயர்குடியிற் பிறந்தாரை ஒவ்வார்.