ஐந்திணை எழுபது ஐந்திணைகளில் ஒவ்வொன்றிற்கும் பதினான்கு பாடல்களைக் கொண்டு, எழுபது பாடல்களில் இந்நூல் அமைந்துள்ளது.

ஐந்திணை எழுபது ஐந்திணைகளில் ஒவ்வொன்றிற்கும் பதினான்கு பாடல்களைக் கொண்டு, எழுபது பாடல்களில் இந்நூல் அமைந்துள்ளது. இந் நூலின் முதலில் விநாயகரைக் குறித்த கடவுள் வணக்கப் பாடல் ஒன்று உள்ளது. இக் கடவுள் வாழ்த்து நூலுக்குப் புறம்பாதலோடு, இதற்குப் பழைய உரைகாரர் உரை எழுதாமையாலும், இச் செய்யுள் நூலாசிரியரே இயற்றியது என்று துணிந்து கூற இயலாது. இச் செய்யுளின் நடைப் போக்கும் ஏனைய பாடல்களினும் வேறுபட்டுள்ளது. ஐந்திணை நூல்களில் வேறு ஒன்றிற்கும் கடவுள் வாழ்த்துப் பாடல் இல்லாமையும் சிந்திக்கத் தக்கது. இந் நூலில் உள்ள 70 பாடலகளில் முல்லைத் திணையில் இரண்டு பாடல்களும் (25, 26), நெய்தல் திணையில் இரண்டு பாடல்களும் (69, 70) இறந்துபட்டன. இந் நூலை ஆக்கியவர் மூவாதியார். இவரைச் சிலர் சமணர் என்று கூறுவர்.

கண்ணை நெற்றியிலுடைய தலையினையுடையவனும். இவ்வுலகமாகிய அண்டத்தினைத் தனது வடிவமாகக் கொண்டவனும் எல்லாவற்றிற்கும் முதற் காரணனாய் உள்ளவனும் ஆலகால விஷமாகிய நஞ்சு பொருந்தியிருக்கும்படியான கழுத்தையுடையவனுமான சிவபெருமான் பெற்றெடுத்த யானைமுகக் கடவுள் யாம் விரும்பும் பொருள்கள் எல்லாவற்றையும் நன்றாக முடிவுபெறச் செய்து எங்களுக்கு (இவ்வுலகத்தே) பொருந்தியுள்ள கல்விப்பொருள்கள் எல்லாவற்றையும் கொடுக்கும்.

விளக்கம்:

(பழைய வுரை) அவரை பொருந்திய கதிரையுடைய பசுந்தினையைக் கவரிமடமா கதுவாநின்ற படர்ந்த சாரலினையுடைய கானகநாடனே! மறவாது நினைப்பாயாக; வயங்கா நின்ற அணியினையுடையாட்கு யான் நடுவுநின்ற புணையினை.

விளக்கம்:

(பழைய வுரை) மன்றங்களிலே நெருங்கிய கல்லின்கண் கருங்கண் முசுக்கள் குதிபாயுங் குன்றகநாடன் என் மனத்தைத் தெளிவித்த தெளிவினைப் பிழையாதென்று தேறினேற்கு அவன் செய்த தலையளி யொன்று; அவ் வொன்றும் அப்பெற்றித்தாய்ப் பழுதாகாது.

விளக்கம்:

(பழைய வுரை) மன்றின்கண் நின்ற பலவின் சுளைமுதிர்ந்த இனிய பழத்தைத் தின்றின்புற்று வந்து ஆமாவின் முலையை மந்தி வருட அவ்வாமாத் தன் கன்றிற்குப்போல அன்பு பட்டுப் பாலைச்சுரக்கும் அணிமலைநாடனை யாமுளேமாகப் பிரிவதிலம்.

விளக்கம்:

(பழைய வுரை) அமைந்தாருடைய நட்புச் சிதைதலின்றி நிலைபெற்று அடைந்தார்க்கு வலியாகி மறுமையின்கண்ணும் பயனைச் செய்யும்; அதுபோல, நீராற்றிகழாநின்ற சோலையையுடைய மலைநாடனுடைய நட்பு மெலிவின்றி இன்பத்தைத் திகழ்விக்கும் என்னாநின்றது என்னெஞ்சு.

விளக்கம்:

(பழைய வுரை) பொன்போன்ற பூங்கொத்தையுடைய வேங்கை கமழாநின்ற குளிர்ந்த சோலையையுடைய நன்மலை நாடனே! மறவாதொழிவாயாக; வயங்கிழைக்கு நின்னல்லது ஓரரணில்லையாதலால், நின்கண்ணோட்டத்தான் இன்னுயிரைத் தாங்கு மருந்து நல்காயோ?

விளக்கம்:

(பழைய வுரை) வெகுள வேண்டா அன்னாய்! குற்றமிலள் இவள்; மிக்க சிவந்தநீர் தாழ்ந்தோடுங் கான்யாற்றுள் தேனோடுங் கலந்து வந்த அருவிநீரைக் குடைந்தாடுதலான் இவள் கண்கள்தாஞ் சிவப்புற்றன : ஆதலான்.

விளக்கம்:

(பழைய வுரை) விரை கமழாநின்ற குளிர்ந்த சுனையின்கண் தெளிந்த நீர் துளும்ப மிளகு படர்ந்து வளராநின்ற இனியமாவினது நறுவிய கனிவீழும் வெறிகமழ் தண்சோலை நாடனே! நின் அறிவின்கண் நின்றதொரு பேதமையுண்டோ?

விளக்கம்:

(பழைய வுரை) பன்றிகள் கொம்பினால் உழுத சுட்டுக்கரிந்த புனக்கொல்லையுள் வாழையின் முதிர்ந்தகாயைக் குரங்கினுட் கடுவன்கள் அப்புழுதியிற் புதைத்தயருந் தாழ்ந்த அருவிகளையுடைய நாடன் என்றொழியாகிய நேர்வளைக்கு அக்காலத்து நெஞ்சூன்று கோலாகத் தெள்ளிய வஞ்சினங் கூறினான்.

விளக்கம்:

(பழைய வுரை) பெருங்கையையுடைய இருங்களிறு ஐவன நெல்லைத் தின்று, கருங்காலையுடைய மராம்பொழிலிற் பச்சிலைநிழலிற் றுயிலும் வண்டுகள் ஒலிக்கும் சோலைமலை நாடன் கேண்மை பொருந்தினார்க்கு ஏமாப்புடைத்து.

விளக்கம்:

(பழைய வுரை) நின்னான் ஒரு காரியமுடையேன், தோழி! நிலையில்லாத என் மன்னுயிர்க்கு அரணஞ் செய்யவேண்டும்; இப்பொழுதே பாம்புகளான் வழங்கப்படுகின்ற நீண்ட சோலையையுடைய நாடனை நம்மனையின்கண் இரா வரவேண்டா என்பதனைச் சொல்.

விளக்கம்:

(பழைய வுரை) தேறலைப் பிறர்கொள்ள வீழ்ந்த தீந்தேன் இறால்களை மரையான்கன்று குளம்பால் உழக்கும் வரையக நாடனே! நீ வரையாது வருவாயாயின், எங்கள் நிரைதொடி உயிர்வாழாள்.

விளக்கம்:

(பழைய வுரை) நீண்ட கதிரினையுடைய பசுந்தினையை வளைவாய்க் கிளியினம் கவரும் நீரானே தெளிந்து திகழாநின்ற சோலைகளையுடைய மலைநாடன் கேண்மையைக் காதலினாலே நிரம்ப மேவினேன்; பிரிதலாற்றேனாயினேன்; அவ்வாற்றாமை தெய்வத்தினாயது என்று முருகற்கு மறியையறுக்கத் துணிந்தான் வேலோன்; தோழி! இதனை விலக்குவாயாக.

விளக்கம்:

(பழைய வுரை) இலை பயின்ற தண்குளவிக் கொடிகள் படர்ந்து மூடிய பொதும்பின்கட் பூங்கொத்தையுடைய காந்தளில் இனவண்டுகள் ஒலிக்கும் வரையகநாடனும் வரைவொடு வந்தான்; ஆதலான், இன்று நமக்கு அன்னை யலைக்கும் அலையும் போயிற்று.

விளக்கம்:

(பழைய வுரை) கொல்லைப்புனத்த அகிலைச் சுமந்து கற்களைப் பாய்ந்து மழையானுளதாய அருவி முழங்குதலான் அழகு பெற்ற நாடன் தன்னை யடைந்தார்க்கு ஈரமுடையன் என்பதனான் அவன் பிரிந்தானாயினும் வாடுதலை மறந்தன என்றோள்கள்.

விளக்கம்:

(பழைய வுரை) செய்ய கதிரினையுடைய செல்வன் சீற்றமடங்கிய காலத்தின்கண் பசுங்கொடியையுடைய முல்லைகள் பூத்து மணங்கமழ்தலான் வண்டுகள் ஒலிக்கக் கார்ப்பருவத்தோடு தடுமாறுகின்ற முகில்களையுடைய வானங் காணுந்தோறும் நீரோடுங்கூடத் தடுமாறாநின்றன கண்கள்.

விளக்கம்:

(பழைய வுரை) பெரியவாய் மெல்லியவாகிய மூங்கில்போன்றிருந்த தோளினையுடையாய்! நம்மைத் துறந்தார் இக்காலத்து வருகின்றிலர்; மெல்லிய நடையினையுடைய மயில்கள் அழைக்கக் கடன் முகந்து மின்னுடனே வந்தது, எழிலினையுடைய வானம்; ஆதலால், பின்னையும் என்னை வந்து, “நீ என் செய்யக் கடவாய்!” என்றிரங்கி ஒன்றைச் சொல்லுவாருமில்லை.

விளக்கம்:

(பழைய வுரை) குளிர்ந்த நறுங்கோடல் துடுப்புப்போலப் பூங்குலைகளை யேந்த, கார்காலத்தை ஏன்றுகொண்டு முகில்கள் மிக்க வானத்தின்கண் உருமேறு ஒலிப்ப, திண்ணிதாக முயங்குவாரை யில்லாதார் நடுங்கும் வகை துன்பத்தைச் செய்யுமாலை கொல்வாரைப் போல வாராநின்றது.

விளக்கம்:

(பழைய வுரை) விரைந்து துளிகளை முகில்கள் இதழகத்தே சிதற, தாதினையுடைய பூங்கொத்துக்களையுடைய கொன்றைகள் எரிநிறத்தை மிகுப்ப, பரந்து கழறுவது போலும் எழில் விசும்பைக் காணுந்தோறும் வருந்தித் துடிப்பது போலாநின்றது என் உடலம்.

விளக்கம்:

(பழைய வுரை) மழைத்துளிகளைக் காதலித்தழைத்துக் காடெலாந் தோகைகளைப் பரப்பி மயிலினங்கள் ஆட, கருக்கொண்டு விரிகுவது போலும் இக்கார் முழங்க எனக்கு என் உயிர் உருகுவது போலாநின்றது.

விளக்கம்:

(பழைய வுரை) இனங்களையுடைய கலைகள் களித்து மிக, புனங்களிலுள்ள கொடிமிடைந்த முல்லை தளிர்ப்ப, இடியோடே கூட மிடைந்து, யானும் என் காதலரும் வருந்த, துன்பத்தைச் செய்யும்மாலை தானும் மழைப்பெயலும் எம்மேல் வாராநின்றன.

விளக்கம்:

(பழைய வுரை) எம்மழகு சுருங்க எம்மை நீங்கினாரும் வருவதற்கு முன்னே கருங்கொடியையுடையமுல்லைகள் நல்லார் எயிறு போல அரும்பக் காரோடு உடனே யுளதாய் வந்து எம்மை நலிகின்ற மாலைக்கு எம்மைப்போல வலியிழந்து மெலிவாற்றி யிருந்து உயிர்வாழ்வார் இல்லை.

விளக்கம்:

(பழைய வுரை) கொன்றை யென்னாநின்ற குழலூதிக் கோவலர் பின்னே நிரைத்து நிற்க, கன்றை விரும்பிய நிரையாயங்கள் ஊர்தோறும் புக, இவ்விடத்தின்கண் வழங்கவேண்டி வந்தது மாலை; யாம் இறந்துபடாதிருந்து காணும்படி முழங்கி வில்லைக் கோலிற்று மழை.

விளக்கம்:

(பழைய வுரை) ஒசையையுடைய முகில்கள் பெயலைத் தொடங்கிக் கார்ப்பருவத்தைக் கொள்ள, நம் காதலர் தேரை போன்ற தழங்கு குரலையுடைய குதிரைத் தார்மணிகள் வாயதிர்ப்ப, இன்று நாம் ஆற்றியுளமாம் வகை வாராது விடுவார்கொல்லோ? தோழி! நம் வளை யாதும் நிற்கின்றது இல்லையால்.

விளக்கம்:

(பழைய வுரை) கல்லெழுந்து கிடந்த கானத்தின்கண் அழகு பெற்றுப் புதல்கண்மிசை முல்லைகளும் செம்முல்லைகளும் பூக்கண்மலர, இரவின்கண் முகிலும் அலைவற்று விட்டன நீரினை; மையுண் கண்களும் முலைகண்மிசை வடித்தன நீரினை.

இருபத்தைந்தாவது, இருபத்தாறாவது செய்யுள் பழம் பிரதிகளில் காணப்பெறாவாய் மறைந்தன.

விளக்கம்:

மழையினை உடைய வாகைமரங்கள் பூத்து மணக்கவும் முல்லை நிலங்களின் எல்லாப் பாகங்களிலும் வண்டுக் கூட்டங்கள் ஆரவாரிப்புடனே ஒலித்துக் கொண்டு திரியவும் பெருந்தன்மை முதலிய நற்குணங்களில்லாமல் பகைத்து என்னை வருத்தும் சிறு பொழுதாகிய மாலைக்காலம் (எனக்கு) மாறாக முயன்று நிற்க (அதனாலே) கண்ணீரானது கண்களில் நிலையாகத் தங்கலாயிற்று. (என் செய்வேன்! என்று தலைமகள் தோழியிடங் கூறினாள்.)

விளக்கம்:

ஆராய்ந்து செய்யப்பட்ட அணிகலன்களை யணிந்த தோழியே! ஆயன் - இடையன் மிகச் சிறந்த பெரிய பூமாலையினை அணிந்து வண்டினங்கள் (சூழ்ந்து) ஆரவாரிக்க (ஆனிரையோடு மனைக்கண்ணே) சேருகின்ற வேளையாகிய மாலைக்காலத்திலே என் பால் தோன்றிய (வருத்தமிக்க) இப்போக்கானது அவ்வாயன் பின்னாக (தோன்றி) நிலைபெற்று ஊர்ந்து வரும்படியான பெய்யும் மழையினாலே தோன்றியதோ? (என்று தலைமகள் தோழியினிடம் வினவினள்.)

விளக்கம்:

தலைச் சூட்டான் விளங்காநின்ற காட்டுக் கோழியானது வரிகளையுடைய மருள் செடியினை கொத்துதலினாலே வழியானது தூர்ந்து போகும்படியான அரிய பாலைநில வழியின் கொடுமையினை நாம் உன்னி - நாம் நினைத்து வருந்துதலால் (ஏதிலார் நம்களவினை) அறிந்து கூறும்படியான பழிச்சொற்கள் மலையினிடத்தே நாட்டப் பெற்ற அக்கொடிச்சீலையினைப் போன்று பரவி வலமாகச் சுழன்று எழுந்து தோன்றாநிற்கும். (என்று தலைமகள் தோழியிடங் கூறினாள்.)

விளக்கம்:

என்மகள் கொல்கின்ற ஆண்யானையை யொத்தவனாகிய தலைமகனின் பின்னாக சிறுகற்கள் பெய்யப் பெற்றுள்ள காற்சிலம்புகள் ஓசையிடவும் மெல்லிய கால்விரல்கள் சிவக்கும்படியாகவும் கற்கள் மேலெழுந்து நிற்கும்படியான பாலை நிலவழியே நடத்தலைச் செய்து செல்வாளோ? (அன்றி (இப்பாலை நிலவழியே) செல்லுதல் நம்மால் முடியாத காரியமென்று நினைத்து வருந்தி வாடி துன்புற்றுத் தங்குவளோ? (யாதோ அறியேன் என்று நற்றாய் தனக்குட்டானே கூறிவருந்தினள்.)

விளக்கம்:

(எம்பெருமானே!) பொரிந்த மேற் பாகத்தைக் கொண்ட மாமரத்தினது அழகு பொருந்திய நிழலினிடத்தே நீளமான நெற்றியினையுடைய களிறானது பெண்யானையுடனே தூங்குதற்கு இடமாயதும் காட்டுத் தீயானது கலந்து காண்பதற்கு இடமாயதுமாகிய காட்டினிடத்தே (நீர் பொருள்வயிற் பிரிந்து) செல்லுதலை (தலைமகண்மாட்டு யான்) சொல்லுதலான் கரிய ரேகைகள் கலக்கப்பெற்று மைதீட்டப்பெற்ற (தலைமகளின்) கண்களில் கண்ணீரானது தங்காது வடியா நிற்கும். (என்று தலைமகனிடத்தில் தோழி கூறினாள்.)

விளக்கம்:

பெருமையினையும் தகுதியினையுமுடைய ஊக்கத்தினுக்கு பொருத்தமாக அருமையான பொருளாக (விருப்பமிகுதியால்) மாறிடுந் தலைவரின் மிக்க விருப்பமானது பெயர்கள் முதலிய குறிக்கப்பெற்ற நடு கற்கள் வரிசையாக நடுவதற்கு காரணமாகிய சிறப்பாக அம்பு தொடுக்குந்தொடையாலே பழைமையாகிய தம் பகைவர்களை (மறவர்கள்) வருத்தற்கு இடமாகிய பாலை நிலவழியிலே ஒழுங்காகச் செல்லுதலையுடையது. (என்று தோழி தலைமகளிடங் கூறினாள்.)

விளக்கம்:

மெல்லிய தன்மையாகிய இரக்கமாகிய பண்பு இல்லாமல் பொருள் தேடுதற்கண் விருப்புற்று நம்மிடத்திலே நிலை பெறாத நெஞ்சினைக்கொண்ட தலைவர் வில்லினாலே முயன்று போர் புரிந்து (அதனால் வரும் பொருளைக் கொண்டு) உண்டு பிழைக்கும் மறவர்கள் விரைந்து வழிச் செல்வாரை வருத்திக் கொள்ளையடிக்கும் படியான கற்கள் சூழ்ந்துள்ள சிறு தூறுகள் நிறைந்த பாலை நிலவழியின் கொடுமையினை நினைத்துப் பார்க்க மாட்டாரா? (என்று தலைமகள் தோழியை வினவினள்.)

விளக்கம்:

ஆராய்ந்து செய்யப்பட்ட அணிகலன்களை யணிந்த தோழியே! என் மனமானது வெட்கத்தினை துறந்து (சாதலில்லா) உயிரினோடு கூடிப்போய் தலைவரினைப் பார்க்க. புணர்ப்பது - விரும்புவதாயுளது உண்ணுதற்கும் நீர் கிடைக்காத அரிய பாலை நிலத்தின்கண்ணே காட்டுப் பசுக்களின் கூட்டமானது (நீரின்றித் தியங்கித்) திரியும் அரிய இடத்தையுடைய வழியின்கண்ணே கடந்து செல்வாரோ? (என்று தலைமகள் தோழியை வினவினள்.)

விளக்கம்:

நம்மீது இரக்கமென்பதைக் கொள்ளாத மனத்தைக் கொண்டவராகிய நந்தலைவர் பீர்க்கங் கொடிகள் மேலேறிப் படர்ந்துள்ள மேற்பாகத்தினுடைய பாழ் வீடுகளில் கூர்மையான நகங்களையுடைய கரடியினது பெரிய கூட்டம் கூடி ஒருங்கி உறங்கும்படியான வறண்ட அரிய பாலை நிலத்தின் கொடுமையினை நினைத்துப் பார்த்து (தன் செலவு வேண்டா வொன்றென) தெரியமாட்டாரா? (என்று தலைமகள் தோழியிடம் வினவினாள்.)

விளக்கம்:

(பொருளினும் அருளே போற்றும் பண்பினது என்னுந்) தெளிவினை மேற்கொண்டிராத நங்காதலர் பிரப்பம்புதர்கள் மிகுந்த காட்டினிடத்தே அணிற்பிள்ளைகள் ஒலிக்கும்படியான கொல்லைகளாற் சூழப்பெற்ற பாலைநிலத்தூர்களில் பொருந்தியுள்ள ஆண் கோழியானது காடைப்பறவையுடனே சண்டை செய்யும்படியான பாலைநிலவழியே தேரின் மீதே இவ்வூரில் நமக்கு இட்டுச் செய்யவேண்டிய காரியத்தை விட்டுவிட்டு நம்மைப் பிரிந்து போவாரோ? (என்று தலைமகள் தோழியை வினவினள்.)

விளக்கம்:

புலியானது பாய்தலினாலே தனது துணையாகிய பிடியினைப் பறிகொடுத்து அச்சமிகுந்து மாவிலங்குமரம் வாடி நிற்கும் பாறைகளுக்கு இடையேயுள்ள வழியினிடத்தே நிறைத்து நிற்கும்படியான களிறானது (தனது துணையினைப்) படுத்த புலியாகிய பகையின் வரவினை எதிர்பார்த்திருக்கும் படியான பாலை நிலத்தின்கண்ணுள்ள நீண்ட மலைத்தொடர்களுடைய அருநெறிக்கண்ணே (காதலர்) நடந்து செல்வரோ? (என்று தலைமகள் ஐயுற்றுத் தோழியிடம் கூறினாள்.)

விளக்கம்:

(மான் முதலியவற்றைக்) கொள்ளுதலில் வல்ல வளைந்த வரிகளையும் நல்ல வெற்றியினையுமுடைய விலங்காகிய புலிகள் கூடித் திரியும் பூக்கள் நிறைந்த அடிப்பாகத்தினையுடைய புதரினியுடைய காடாகிய பாலை நிலவழியின்கண்ணே வீரத்தினைக் கொண்ட வலிமை மிக்க காதலர் முயற்சியினிடத்தே மிகுதியுங் கொண்ட விருப்பத்தினாலே (இங்குத் தங்குதலாலேற்படும்) நன்மையினை அறியாமல் (நம்மைப்) பிரிந்து சென்றனரோ? (எனத் தலைமகள் ஐயுற்றுத் தோழியை வினவினள்.)

விளக்கம்:

எனது ஆருயிரே! பிளந்த வாயினையுடைய பெரிய புலியானது யானையினை கொள்ளுதலினின்றும் தவறிப்போய் (மறவர்தம் கொள்ளையாற்) பாழ்ப்பட்ட ஊரினது மன்றத்தின்கண் புகுந்து (உணவினை) நாடி நிற்கும்படியான அரிய பாலைநில வழியே நெருங்கி பொருள் தேடவேண்டுதலினாலே பிரிந்து சென்ற தலைவரது தண்ணளியினை இன்னும் எதிர் பார்த்து (மடியாது) வாழ விரும்புகின்றனையோ? (என்று தலைமகள் தன்னுயிருடன் வினவினள்.)

விளக்கம்:

நந்தலைவரின் மனமானது (பொருள் தேடுதலை மேற்கொண்டு) சென்ற வழியானது முட்களையுடைய மூங்கிற் புதர்கள் சூழ்ந்து பின்னிக்கொண்டு கிடக்கும்படியான தோட்டத்தினிடத்தே புள்ளிகளையுடைய காட்டுப்பூனையானது தனது குட்டிக்கு உணவினைத் தேடித் திரிதலோடு ஆறலைப்போர் சஞ்சரிக்கும் கொடிய பாலைவனம் என்று சொல்லுவர் பலர். (என்று தலைமகள் தோழியிடங் கூறினள்.)

விளக்கம்:

மலையிடத்தினை நெருங்கிச் சென்று பாலைநிலத்தூர் பலவற்றைக் கடந்து (பொருள்வயிற்) பிரிந்த நந்தலைவர் மன்றின் கண்ணுள்ள ஆலமரத்தில் வாழும் ஆந்தையானது ஒலிக்க அடிக்கடி நலமிகுந்த தும்மலானது (நம்மிடத்துத்) தோன்றாநின்றதாதலின் களவின் கண் நம்மாட்டு அவர் கொண்ட கடுங்காதல் போன்று இஞ்ஞான்றுங் கொண்டு மீள்வர்போற் காண்கின்றது. (என்று தோழி தலைமகளிடங் கூறினாள்.)

விளக்கம்:

வானளாவிய குன்றுகளாகிய பாலை நில வழியே கடந்து சென்ற நங்காதலரை நாம் நினைத்த வளவிலே நம் அழகிய கண்களிலே இடக்கண்ணானது துடித்தாடாநின்றது நாம் காண்கின்ற கனவுகளும் நற்பொருளுடையனவாயுள்ளன அவற்றால் பூரித்த நம் மெல்லிய தோள்கள் அழகுற்று நோய் நீங்கும் வண்ணம் பல்லியானது இணக்கமாக நிமித்தஞ் சொல்லாநின்றது. (என்று தோழி தலைமகளிடங் கூறினாள்.)

விளக்கம்:

அழகிய மாட்சிமைப்பட்ட அணிகலன்களை யணிந்த தோழியே! தமரை - தம்மவராகிய தலைமகனாரைக் (காணாவிடத்து அவராற் காதலிக்கப்படும் பரத்தையர் அறிவிலாரென்று திட்டி சினத்தை மேற்கொள்வர் ஒப்பற்ற தாமரைப் பூக்கள் இடையிட்டுக் கிடக்கும்படியான இடத்தினையுடைய மருத நிலத்தூர்த் தலைவனாகிய தலைமகனை எதிரே பார்த்தவளவில் அடங்கியும் இருப்பார்கள் (அங்ஙனம் வஞ்சகர்களாகிய அவர்களை நாடித் தலைமகனார் பிரிந்து சென்றது) இப்பொழுது மிகுதியும் மன நோயினைச் செய்யா நின்றது (அந்நோயின் கொடுமை வாய் விட்டுக் கூறுந்தரத்ததன்று) என்னெஞ்சமே (அதனைத்) தெரியுந் தரத்தது. (என்று தலைமகள் தோழியிடங் கூறினாள்.)

விளக்கம்:

ஒளியினையுடைய அணிகலன்களையணிந்த தோழியே! (களவுப்புணர்ச்சி நிகழ்ந்த) அக்காலத்திலே (கூறிய உறுதி மொழிகள்) பலரும் நினைவிலிருத்தக் கூடிய வஞ்சக மொழிகள் என்று தெரிந்து கொள்ள முடியாத யான் அக்காலத்தே (தலைமகன்) பணிவுடன் கூறிய அவ்வுறுதி மொழிகளை எழுத்துவடிவமாக (எழுதித்தரப்பெற்றுக்) கொண்டேனுமில்லை நிறமிக்க இதழ்களையுடைய தாமரைப் பூக்கள் இடையிட்டுக் கிடக்கும் ஊர்க்குத் தலைவனாகிய தலைமகனைப்பற்றி மனமுழுவதையு மொன்று சேர்த்து (என்னை) எண்ணுவதில்லை என்பதாக எவரிடத்தில் (குறை) கூறிக்கொள்ளட்டும்? (என்று தலைமகள் தோழியை வினவினள்.)

விளக்கம்:

போர்வன்மையினை கொண்டவனாகிய அரியசெல்வத்தினையுடைய நல்ல மருதநிலத்தூர்த்தலைவன் மேற்பாகத்தினிடத்தே சிறிய காயானது பொருந்தியுள்ள வஞ்சிச் செடியினைப் போன்று கணுக்கள் சிதறுதலால் (தோன்றும்படியான முத்தினைப் போன்ற தன் மகனை மார்பின் மீதே நெருக்கித் தழுவிப் பிடித்து மேலாடை சிதையும்படியாக (செய்பெருஞ் சிறப்பின்கண்ணே) காணப்பெறுகின்றனன். (என்று தோழி கூறி மகிழ்ந்தாள்.)

விளக்கம்:

பரந்த மருதநிலத்துள்ள ஊர்க்குத் தலைவனான என் காதலனை மலர்மாலையினாலே (பரத்தையர்) கட்டிக் கொண்டு போயதனால் (அவர் மாட்டு) மாறுபாட்டினை எண்ணி இருத்தலைச் செய்கின்றனன் அறியாமையினை செய்து நடப்பவராகிய பிறமகளிராகிய பரத்தையரை மனம் பொருந்தி (தலைமகன் பிரிவுக்காக) நொந்து கொள்வது எற்றுக்கு? (அன்பும் உறவுமுடைய தலைமகனை நோவதே நெறியாம் என்று தலைமகள் கூறிக் கொண்டனள்.)

விளக்கம்:

பாணனே! (தலைமகன் முன்பு தழுவியமைந்த) எமது கழுத்தினிடத்தே இனித் தழுவதற்கு நேரமின்றி என் மகன் முலையுண்ணும்படி அமைந்துளான் மேலும் நாம் தலைமகற்குத் தகுதியின்றி மூப்பினையடைந்தோம் (ஆதலின்) நீ இவ்விடத்தினின்று நீங்கி முன்னோக்கி வளருகின்ற முலைகளையுடைய பரத்தையரது சேரியினிடத்தே சென்று (அங்குள்ள தலைமகனுக்கு எமது மூப்பு முதலிய செய்திகளை) இயம்புவாயாக கள் முதலிய குடிநீர்வகைகளையும் இறைச்சிகளையும் விரும்பி பரத்தையர் முன்பாக நாடக முதலியனவற்றை நடத்தி உண்ணுதலைச் செய்யினும் செய். (என்று தலைமகள் பாணனிடம் கூறினாள்.)

விளக்கம்:

என்னருமைப் பாணனே! இவ்விடத்தே இருப்பாயாக புது வருவாயினையுடைய நல்ல மருதநிலத்தூர்த் தலைவனது மேன்மையினை (பலபடியாகஎடுத்துச்) சொல்லுதலாகிய அப்போக்கினை ஒழித்து விடுவாயாக பெருமைமிக்கபாணனே! நாண் உடையான் - (பிறபெண்டிரைக் காணுதலில்) வெட்கமுற்றுப் பின்வாங்கும் பெருமையினையுடைய தலைமகனுக்கு நேர்ந்த குறைகளெல்லாம் இருக்கட்டும் உனது வாழ்க்கையில் பொருந்திய குறை யாதேனும் உளதாயின் எடுத்துச் செல்வாயாக. (என்று தலைமகள் பாணனிடங் கூறினாள்.)

விளக்கம்:

பாணனே! உழலை மரத்தினை நாசப்படுத்திய சிவந்த கண்களையுடைய எருமையானது மருத நிலத்தூடே தவழ்ந்து சென்று கழனியிலே மேய்ந்து (மருதமர) நிழலின் கண்ணே தங்கியிருக்கும்படியான குளிர்ந்த இடத்தினையுடைய ஊர்க்குத் தலைவனாகிய தலைமகனது (வண்டுகள் பல படியும் வண்ணம் மலர்ந்து கிடக்கும்) மலர்போன்ற காதலினை கொண்டு சேர்த்து ஊர்க்குப் புறத்தேயுள்ள சேரியில் வாழும் பரத்தையர்க்கு சொல்வாயாக. (என்று தலைமகள் பாணனிடங் கூறினாள்.)

விளக்கம்:

பாணனே! பல்வகை யொலிகள் மிகுந்த மருதநிலத் தலைவனாகிய தலைமகனுக்கு மகனையே (பிரிவின் கண்) துணைவனாகிய சான்றோனெனும் அடைக்கலமாகக் கொண்ட பெண்பாலாகிய நாம் என் செய்து பயன்படப் போகின்றோம்? (அவற்கு எம்மால் ஆவது யாதுமின்று பூக்கள் நிறைந்த சுருட்டி முடித்த மயிரினையுடைய திருமகளை யொத்தவராகிய (அவற்கு வேண்டிய) பரத்தையரின் சேரியினிடத்தே ஒழியாது நீபோவாயாக. (என்று தலைமகள் பாணனிடங் கூறினாள்.)

விளக்கம்:

(பாணனே!) நாடோறும் குற்றமில்லாத பொன்னாற் செய்த வளையணிந்த கைகளை வீசியும் விரித்தும் விளையாடும் என் புதல்வனாகிய சிறுவனை பாது காவலாக கொண்டுளேன் (ஆகலின்) பொய்கை - நல்ல நீர் நிலைகளையுடைய நல்ல மருத நிலத்தலைவனாகிய தலைமகனின் ஒழுக்க முறைகளை எடுத்தியம்ப வேண்டா (தலைமகன் பிரிய நேரிட்டது) எனது தவறேயாயினும் (ஆகட்டும்) (இவ்விடத்தை விட்டு) எழுந்து நடப்பாயாக. (என்று தலைமகள் பாணனிடங் கூறினாள்.)

விளக்கம்:

தடாகத்தினிடத்தே மேய்ந்து வாழும் வரால்மீன் கூட்டம் திரியும்படியான குளிர்ந்த இடத்தினையுடைய மருதநிலத்திற்குரிய தலைவனே! ஒண் தொடியை - ஒள்ளிய வளையினையணிந்த தலைமகளை கடைக்கணிக்காதவனாய் எமது மனையினைவிட்டு நீங்கி அப்பரத்தையர் சேர்ந்து வசிக்கும் சிற்றூர்க்கு போகின்ற போக்கினை பெரிய காரியமாக ஏற்படுத்திக் கொள்வது (பெருந்தன்மை மிக்க நினக்குத்) தக்கதாமோ? (என்று தோழி தலைமகனை வினவினள்.)

விளக்கம்:

(எம் பெருமாட்டீ!) பல்விதவளத்தாற் சிறந்த வயல்களாற் சூழப்பட்ட மருத நிலத்தூர்த் தலைவனாகிய தலைமகன் மாயமொழிகளைக் கூறி மயக்கும் பரத்தையரது வளைந்த சக்கரம் போன்ற மோதிரமணிந்த கைகளால் கொள்ளப்படுதலினின்றும் தப்பி என்றைக்காவது நடுவிலே தோன்றி நம்மிடத்து வருவானாயின் உன்னுடைய வாழுங் காலத்திலே அவனைச் சாருவித்து வேண்டியவெல்லாம் பெற்றவள்போல மகிழ்வேன். (என்று தோழி தலைமகளிடங் கூறினாள்.)

விளக்கம்:

ஆழ்ந்த ஆராய்ச்சிமுறைகள் நிறைந்த பெரியோர்கள் ஏற்படுத்தியது (இல்லறம் அன்போடு கூடியது என நினையாது கலவியொன்றினையே கருதும் பரத்தையரிடத்தில் (காட்டிய) அருளினை இனி விட்டொழிப்போம் எனக் கருதி நின்பால் வணக்கத்தினை மேற்கொண்டுள்ள வளப்ப மிக்க கழனிகள் சூழ்ந்துள்ள ஊர்க்குத் தலைவனாகிய தலைமகனது (நீ அவனை ஏற்றுக் கொள்ளாமையாலுண்டாங்) குற்றப்பாடு நின்னையே சாரும். (ஆகலின், அவனை ஏற்றுக் கொள்வாயாக, என்று தோழி தலைமகளிடங் கூறினாள்.)

விளக்கம்:

யானே யன்றி நீங்களும் வெள்ளமானது நெருங்கி மிகுதலானுண்டாகிய ஒலிக்கின்ற நீர்வளமிக்க மருதநிலத் தலைவனாகிய நம் தலைமகனை உள்ளன்பின் மிகுதியினின்று முழுவதும் நீங்கும்படியாக இனித் தழுவாதிருப்பீர்களாக அறியாமையிலே அகப்பட்டு அளவில்லாத தலைமகனது விருப்பம் நீங்கும்படி (காதன் மொழிகள் பல) கூறி (தலைமகன்மாட்டுக்) குறையிரக்கா திருப்பீர்களாக. (இங்ஙனம் சில காலம் நாம் ஒற்றுமையாக இருப்போமாயின், தலைமகன் முன்போல் நம்மாட்டுக் காதல் கொண்டு ஒழுகுவன், என்று தலைமகள் தன் மாட்டு வந்து, தலைமகனின் அன்பின்மையினை எடுத்துச் சொன்ன பரத்தையரிடத்தும், ஏனைத் தலைவியரிடத்தும் கூறினாள்.)

விளக்கம்:

நறு மணமிக்க மலர்த் தடங்களையுடைய மருத நிலத்தேயுள்ள கழனி சூழ்ந்த ஊர்க்குத் தலைவனாகிய தலைமகனை அழகிய கண்களையுடைய மகன் கால்களால் துவைத்து சிதைத்துக் கொண்டிருக்க (தலைமகனார்) இந் நிலையிலே என் பாவை போல்பவளாகிய தலைமகளின் (மகப் பெற்றமையால்) நெகிழ்ந்துள்ள முலைகளை விரும்பி முன்னோக்கி வளர்ந்து காணும்படியான அம் முலைகளின் நுனியினை கைகளால் நெருடி மகிழ்ச்சி யுறுவார். (என்று செவிலி நற்றாயிடங் கூறினாள்.)

விளக்கம்:

(தோழியே!) (ஏறிவந்து பாய்ந்து) இறங்கிச் செல்லும்படியான அலைகளையுடைய கடற்கரையினிடத்தே (வாழும்படியான) பெரிய கடற் பறவைகளின் இறகுகளினின்றும் சுழன்று வெளிபடும் காற்றானது எடுப்பாக வீசும்படியான துறைமுகத்துக்குரிய தலைவனாகிய தலைமகனை (வஞ்சகமின்றி) அறியாமை யொன்றினையே யுடையான் என தெரியும்படியான மனத்தையும் நன்றாக நாம் கொண்டிருத்தல் நம் வாழ்க்கைக்கு நன்மையையுண்டாக்கும் நற்போக்கன்றோ? (என்று தலைமகள் தோழியை வினவினள்.)

விளக்கம்:

தோழியே! என்னை கொல் - யாது காரணம்? அவர்கண்ணும் - நம்தலைமகனார் மாட்டும் விரைந்து வரைதலை மேற்கொள்ளுமாறு காணப்பட்டிலது செவிலி நம்மாட்டு நடந்து கொள்ளும் மனப்போக்கும் (களவு வெளிப்பட்டமையினாலே அம்முறையிற் கொடுமையினைக் கொண்டுள்ளது அழகிய மலர்களையுடைய புன்னை மரங்கள் நிரம்பிய துறைமுகத்துக்குரிய தலைவனாகிய தலைமகனுக்கு (இம்முறையாக வரைவு நீட்டித்தல்) பொருத்தமாகுமோ? (பொருந்தாது ஆதலின்) நின்னையல்லாமல் வேறு துணை (எனக்கு) இல்லையென்று (தலைமகனுக்குச்) சொல்வாயாக. (என்று தலைமகள் தோழியிடங் கூறினாள்.)

விளக்கம்:

வளைந்த காதணிகளையுடைய தலைமகள் பறவைகளின் ஒலிகளை அறிந்து (அலைகளாலும் காற்றினாலும்) இடப்பட்ட மணல் மேடுகளையுடைய இருப்பிடமாகிய கடற்கரைச் சோலைகளையுடைய துறைமுகத்திற்குரிய தலைமகனது விரைந்து செல்லுங் குதிரையின் (கழுத்திலணியப்பெற்ற மணிகளின் ஒலியென்று (நினைத்து தன் சுற்றத்தாராகிய பரதவர்கள் தனது மனத்தினடத்தே உண்டாகுகின்ற மனக்கலக்கத்திற்கு (இவ்வொலி காரணமாகுமோ என மதித்தறிவர் என நினைத்து இரவுக்குறி யிடம்வரை சென்று தலைமகனாகிய நின்னைக் காணாது திரும்பினாள். (என்று தோழி தலைமகற்குக் கூறினாள்.)

விளக்கம்:

(தலைமகனை இரவுக்குறிக்கண் சார்ந்து திரும்பிவந்து உறக்கங் கொள்ளாத) எம்மைப்போல செறிந்த மணன்மேடுகளின் மீது அலைகள் மோதி நடக்கும்படி (பெரியோர்களால்) துணிந்து வரையறுக்கப்பட்ட மூன்று தன்மைகளையுடைய கடல் உறங்காமையை மேற்கொண்டது நீலமணிபோன்ற நிறத்தையுடைய நெய்தற்பூக்கள் (மலர்ந்த பெரிய உப்பங்கழிகளையுடைய கடற்கரைத்தலைவன் தனது அழகிய நலமாகிய இன்பத்தை மேற்கொண்டு நீங்கிவிட்டான் என்று நினைத்துதானோ? (என்று தலைமகள் தோழியை வினவினள்.)

விளக்கம்:

ஆராய்ந்து செய்யப்பட்ட அணிகலன்களை யணிந்த தலைவியே! கண்களின் தன்மையினைக் கொண்ட நெய்தற் பூக்கள் மணக்கும்படியான வளைந்து செல்லும்படியான கடற் கால்வாய்களையுடைய குளிர்ந்த அழகிய துறை முகத்துக்குரிய தலைமகனோ தனது பழைய போக்கினை மேற்கொண்டிராதவனாய் அழகினையுடைய அவன் கைகளில் நாம் அகப்பட்டுக் கொண்டதனை தனது ஆண்மையின்பாற்பட்ட செய்தி என்று எண்ணிஇறுமாப்புற்று ஒழுங்காக அமைக்கப்பட்ட தேரின்கண்ணே அமர்ந்து (வரைதலை எண்ணாது) வாராநின்றனன். (என்று தோழி தலைமகனிடங் கூறினாள்.)

விளக்கம்:

(யாங் களவுப் புணர்ச்சியிற் கண்டு கூடிய) கடற்கரைச் சோலையினிடத்தே தங்கியிருக்கும் நாரைகள் துள்ளி விளையாடும் சுறாமீன் தொகுதியாகிய கூட்டமானது கலந்து சிதறும்படியாக மோதும்படியான வீசுகின்ற அலைகளையுடைய கடற்கரைத் தலைமகனின் (பிரியேன் என்று கூறிப் பிரிந்த) தீமையினை காட்டு வழியிடத்தே பொருள் வேண்டிச் சென்று (என் மேலுள்ள மிகுந்த) அன்பானது இல்லாமல் காலநீட்டித்திட தெரிந்தும் தெரிந்துகொள்ளமாட்டாவோ? (என்று தலைமகள் தனக்குட்டானே வினவி வருந்தினாள்.)

விளக்கம்:

என்னுடைய தோழியாகிய தலைமகளே ! நுட்பமாகிய கயிறுகளாலே பின்னப்பட்ட வலையினாலே நெய்தல் நிலமக்கள் பிடித்துக் கொண்டுவந்த பலவித மீன்களாகிய கருவாட்டினை (புட்கள் சென்று) பற்றிச் செல்லுதற் கிடமாகிய கடற்றுறைமுகத்துக்குரிய தலைமகனை நம் கண்களால் காணும்படியாக நேருமோ? (அங்ஙனங் காண நேருமாயின் (அவனை விடாது) பின்தொடர்ந்து (களவுப் புணர்ச்சியிற் கைக்கொண்ட) கன்னித் தன்மையாகிய அழகினை கொடுப்பாய் என்று நாம் கேட்போம். (என்று தோழி தலைமகளிடங் கூறினாள்.)

விளக்கம்:

சிறிய மீன்களே அலகிடையே வைத்துள்ள சிவந்த இறகுகளையுடைய நாரையே! இறும் - வருந்துதலையுடைய மெல்லிய ஒலியினையுடைய உன்னுடைய குஞ்சுகளையே கருதி மீன்களைக் கொல்கின்ற (களவுக்காலத்திருந்து எம்மைக் கண்டு கொண்டுள்ள) நீ அலைந்து செல்லும் நீரினையுடைய பெரிய கடற்கால்வாய்களையுடைய கடற்கரைத்தலைவன் என்னைவிட்டுப் பிரிந்த முறையினை நன்கு தெரிவாய். (ஆகலின், நீயே எனக்குற்ற சான்றாகுவை, என்று தலைமகள் நாரையினை நோக்கி நலிந்து கூறினாள்.)

விளக்கம்:

தெளிந்த நீரினைக் கொண்ட பெரிய கடற் கால்வாயிடத்திலே விரும்பிய வளவு மீன் முதலிய உணவுகளை உண்டு அருகிலுள்ள பனைமரத்தின்மீதே தங்கும்படியான வளைந்த வாயினையுடைய இணை பிரியாது அன்றிற் பறவையே! மடமொழி - இளமையான மழலைச்சொற்களையுடைய தலைமகளின் (களவுப் புணர்ச்சியிற் கைக்கொண்ட) கன்னித் தன்மையாகிய அழகினை திருப்பிக் கொடுத்துவிடுவாய் என்று வேண்டிய மொழிகளையடுக்கி குளிர்ந்த அழகிய துறைமுகத்திற்குரிய தலைமகற்கு (சென்று) சொல்வாயாக. (என்று தோழி அன்றிற்பறவையிடம் கூறினாள்.)

விளக்கம்:

அடப்பங்கொடிகள் மேலேறிப் படரும்படியான மணன் மேடுகளில் நண்டுகள் நடமாடும்படியான வளைந்து செல்லும் உப்பங் கழிகள் (சூழ்ந்த கடற்கரைத் தலைவன் (வரைவு நீடுதலின்) அன்புள்ளவனாகான் என்று அறிதலால் நல்ல வளையல்களையணிந்த நந்தலைமகள் துன்புறும்படியாக வஞ்சகனாகி மற்றொரு குலமகளையடையும் வழியிலே ஒழுகி தலைமகன் செல்வானோ? (ஒருகாலுஞ் செல்லான்

விளக்கம்:

கண்களிலுள்ள விழிகளைப்போல் திரட்சியுற்றிருக்கும்படியான முத்துக்களை கொடுக்கும்படியான பெரிய கடலினிடத்தே பொருள்களை ஏற்றுமதி செய்யும்படியான மரக்கலங்கள் வந்து போகும்படியான துறைமுகத் தலைவனை தாழைகள் சூழ்ந்த கடற்கரைச் சோலையினிடத்தே (இன்று அரிதாகக்) காணப்பெற்றேன் (இவனைக் காணுதல் முன்பு இன்பந்தருமென உணர்ந்து) நிலைபெற்றிருந்த உணர்ச்சியானது (இப்பொழுது) இல்லாத யான் (புணர்ச்சி துன்பம் தரும்) என்று தெரியலானேன். (என்று தலைமகள் கூறினாள்.)

விளக்கம்:

கரைமேலேறி வருகின்ற அலைகளினாலே கடலினின்றுங் கொண்டுவந்து போடப்பட்ட மேடாகிய மணலிடத்தே இருபிரிவாக அமைந்துள்ள கால்களையுடைய ஆண் நண்டானது தன்னுடைய பெட்டை நண்டுகளுடனே ஓடிவிளையாடும்படியான ஒப்பற்ற பெரிய கடற்கால்வாய்களையுடைய கடற்கரைத் தலைவனே! என் தோழி தோள் - என் தோழியாகிய தலைமகளின் தோள் (நின் பிரிவாலே) படரப்பெற்ற பசலைபூக்கப்பெற்று வருந்தாநின்றது. (நீ வந்து அப்பசலை நோயை நீக்குவாயாக

அறுபத்தொன்பதாவது, எழுபதாவது செய்யுள் பழைய ஏட்டுப் பிரதிகளின் சிதைவாற் காணப் பெறவில்லை.